A. Mafhungo a zwino kha Shango

1. Khetho dza Mivhuso Yapo dza 2021 (LGE)

1.1. Khabinethe i khou livhuwa vhakhethi vhoṱhe vhe vha vha vho tewa nga u khetha nge vha khetha kha Khetho dza Mivhuso Yapo dza 2021 nga Musumbuluwo, wa ḽa 1 Lara 2021. Hedzi dzo vha khetho dza u fhululedza miṅwaha ya 21 u bva tshe ha vhumbwa sisṱeme ya demokirasi ya mivhuso yapo fhano Afrika Tshipembe.

1.2. Ri khou fhululedza u konḓelela, vhuḓifari havhuḓi na u vha na mbilu ndapfu he vhakhethi vha hu sumbedza nga Ḓuvha ḽa Khetho. Nḓila ye mahoro a zwa polotiki a dzhenela ngayo Khetho dza Mivhuso Yapo hu songo vha na khakhathi khathihi na u bvelela ha vhonkhetheni vhane vha kha ḓi vha vhathu vhaswa, nga maanḓa vha vhafumakadzi, zwo vha vhuṱanzi ha demokirasi yashu ine ya tshila nahone i shumaho zwavhuḓi. 

1.3. Khabinethe yo fhululedza vha Khomishini ya zwa Khetho ya Afrika Tshipembe, mahoro oṱhe a polotiki, miraḓo ya tshitshavha khathihi na mazhendzedzi a khombetshedzo ya mulayo fhano shangoni kha tshumisano yavho ye ya ita uri hu vhe na khetho dza mulalo. Khabinethe yo dovha hafhu ya fhululedza vhoramafhungo kha mushumo wavho wa ndeme wa u ṋetshedza vhakhethi mafhungo o teaho e a vha thusa uri vha kone u ita pfanelo dzavho dza demokirasi dza u nanga vharangaphanḓa vhavho vha mivhuso yapo vhane vha vha takalela.

1.4. Khabinethe yo dovha hafhu ya tsivhudza MaAfrika Tshipembe vhoṱhe uri vha khwaṱhise demokirasi yashu nga u shela mulenzhe nga nḓila yo fhelelaho kha dziforamu na zwiimiswa zwine zwa ḓo ita uri avho vho khethwaho vha vhe na vhuḓifhinduleli. Yo dovha hafhu ya ita khuwelelo kha vhaofisiri vhaswa vhane vha kha ḓi tou bva u khethiwa uri vha fulufhedzee kha miano yavho ye vha ita musi vha tshi khethiwa, khathihi na u shumela vhathu vhoṱhe nga nḓila i linganaho nahone i pfalaho.

2. U haelwa

2.1. Khabinethe yo fhululedza MaAfrika Tshipembe vhoṱhe vhe vha nanga u ḓitsireledza khathihi na u tsireledza vhafunwa vhavho nga u ya vha haelwa hu tshi itelwa Dwadze ḽa Khoronavairasi (COVID-19). Shango ḽashu ḽo no ṋetshedza phimamushonga dza khaelo dzine dza fhira 22 miḽioni u swika zwino.

2.2. Vhathu vhararu kha vhathu vhaṱanu vhaṅwe na vhaṅwe vha miṅwaha i fhiraho 50 fhano shangoni ḽashu, ndi vhane u swika zwino vho no haelwa. Ri khou tea u fhedza ro swikela tshivhalo tsha vhathu vhoṱhe vhuṱanu havho vha tshigwada tshenetsho tsha vhathu vho haelwaho vha miṅwaha yeneyo nga tshifhinga tsha mafhelo a ṅwaha u itela u fhedza maanḓa luṱa lwa vhuṋa lune lwa khou lavhelelwa.

2.3. Fulo ḽa mafhelo a vhege a Vooma Vaccination Weekend ḽine ḽa khou ḓo vha hone nga ḽa 12 u swika ḽa 14 Lara 2021, ndi tshikhala tsha uri avho vhane a vha athu haelwa, na vhone vha ḓidzhenise kha nndwa ya lushaka ya u lwa na COVID-19 nga u ya vha haelwa nga mahala kha vhupo vhuṅwe na vhuṅwe ha muhaelo u mona na shango.

2.4. Khabinethe yo tsivhudza vhathu uri vha humbule u ya vha wana phimamushonga ya vhuvhili ya khaelo ya Pfizer uri vha kone u vha vho tsireledzeaho lwa tshoṱhe. Khaelo dzi thusa kha u thivhela u lwala nga nḓila yo kalulaho, u valelwa vhuongeloni kana u lovha nga mulandu wa COVID-19.

3. Fulufulu

3.1. Khabinethe i khou dzhiela nṱha u thithisea na u kanganyisea nga mulandu wa u dzulela u khauwa ha muḓagasi hune vhadzulapo vha Afrika Tshipembe vha khou ṱangana naho zwazwino. Muhasho wa Mabindu a Muvhuso u khou shumisana zwavhuḓi na vha Bodo ya Eskom khathihi na vha vhulanguli u itela u vhona uri hu khou fhungudzwa vhuhulu ha tshifhinga tshine muḓagasi wa vha wo khauwa ngatsho nga ḓuvha khathihi na tshifhinga tshine maga aya a ḓo tea u shumiswa.

3.2. Muhasho wa Vhufaragwama ha Lushaka u khou shumisana na vha Eskom nga u vha ṋea thendelo yo teaho ya uri vha kone u wana zwiperephatsi zwine zwa ṱoḓea musi hu tshi tea u lugiswa zwiṱitshi khathihi na u zwi ṱhogomela. Eskom i khou dovha hafhu ya ita mvelaphanḓa khulwane kha zwa u tholwa hafhu ha vhashumi vha re na vhukoni – hu tshi katelwa vhalangi vha zwiṱitshi zwa muḓagasi – uri vha kone u thusa tshiimiswa itshi tsha muḓagasi kha u ita uri hu vhe na u khwinifhadzea ha zwithu kha zwiṱitshi zwa muḓagasi zwo fhambanaho khathihi na kha mishumo yo fhambanaho ya bindu.

3.3. Kha tshenetshi tshifhinga tsha themo ya vhukati, muvhuso u khou thoma u shumisa maga o fhambanaho a u lingedza u tandulula khaedu dzashu dza zwa fulufulu nahone ri khou ita zwoṱhe zwine ra nga kona uri ri ḓise vhuṅwe vhubveledzi vhuswa ha muḓagasi nga tshifhinga tshiṱukuṱuku u ya nga hune zwa nga konadzea ngaho.

3.4. Maga ayo ndi ane a katela:

- u engedza vhunzhi ha muḓagasi une khamphani dza tea u ḓibveledzela hu si na ṱhoḓea ya u tea u vha na ḽaisentsi u swika kha 100 megawathi (MW);
- u ḓivhadzwa ha vhawini vha khwevhophikisano vha fumithihi (11) vha Mbekanyamushumo ya u Wanwa ha Vhabveledzi vha Muḓagasi vho Ḓiimisaho nga Vhoṱhe ine ya Fhungudza Khovhakhombo; khathihi na
- Bid Window Five ya mbekanyamushumo ya fulufulu ḽi vusuluseaho ya u wana 2 600 MW ya vhubveledzi vhuswa ha muḓagasi u bva kha thandela dza vhukati ha muya na masana a ḓuvha.

3.5. Naho hu na uri Khabinethe i a zwi ḓivha uri khaedu dza zwa fulufulu dzine dza vha hone zwazwino dzi a kanganyisa dza dovha dza khakhisa nyaluwo ya ikonomi, i khou vha na fulufhelo ḽa uri tsheo dzi vhonalaho dzine muvhuso wa khou dzi dzhia u itela u dzudzanyulula na u khwaṱhisa sisṱeme yashu ya zwa muḓagasi, dzi ḓo fhedza dzo khwinifhadza vhukoni ha shango ḽashu ha u ṋetshedza fulufulu. 

4. Vhubindudzi

4.1. Afrika Tshipembe ḽi khou bvela phanḓa kha u vha fhethu havhuḓi ha zwa vhubindudzi, lune ḽa khou kona u kunga maṅwe a mabindu mahulwanesa ḽifhasini uri a engedze zwa vhubindudzi hao fhano shangoni.

4.2. Khamphani ya zwa mimoḓoro ya ha Toyota fhano Afrika Tshipembe yo rwela ṱari ḽimaga ḽayo ḽa zwa vhubveledzi ha mimoḓoro ḽa masheleni a linganaho R2,6 biḽioni ngei Durban hune ha vha kha ḽa KwaZulu-Natal. Ḽimaga iḽi ḽi ḓo maga lushaka lwa u tou thoma lwa zwiendedzi zwa makwevho zwi shumisaho muḓagasi fhano Afrika Tshipembe. Hezwi ndi tshipiḓa tsha vhuḓikumedzeli kha pulane khulwane ya nḓowetshumo ya zwa mimoḓoro nga vha khamphani iyi vha tshi itela u engedza vhuhulwane ha vhubindudzi havho.

4.3. Uhu u rwelwa ṱari hu khou vha hone ho tou salana murahu na nḓivhadzo nga vha khamphani ya u dzudzanya na u putela zwiḽiwa i ḓivheaho ḽifhasi ya ngei Sweden, ine ya ḓivhiwa sa Tetra Pak, he vha ḓivhadza uri vha ḓo bindudza masheleni a linganaho R500 miḽioni a u engedza vhuhulwane ha vhubveledzi havho kha ḽimaga ḽavho ḽa zwishumiswa zwa u panga zwiḽiwa khazwo.

4.4. Khamphani ya Aspen Pharmacare yo vula davhi ḽiswa ḽa u bveledza tshidzikisavhuṱungu tsha Diprivan fhano hayani sa tshipiḓa tsha vhubindudzi ha masheleni a linganaho R3,2 biḽioni kha u fhaṱa tshiimiswa tsha vhubveledzi ha mishonga tsho kunaho nahone tsha maimo a nṱha khathihi na u shandukisa vhupo uho vhu re ngei Gqeberha hune ha vha kha vunḓu ḽa Kapa Vhubvaḓuvha ha fhedza nga u vha fhethu ha zwa mishonga ha khwinesa kha dzhango ḽoṱhe ḽa Afrika. Hetshi tshidzikisavhuṱungu ndi tshe u thomani tsha vha tshi tshi tou ṱunḓwa u bva kha mashonga a nnḓa nahone tshi shumiswa kha vhunzhi ha miaro yo ḓoweleaho ya zwa dzilafho kha maongelo a fhano Afrika Tshipembe, nahone tsho dovha hafhu tsha shumiswa na kha u lafha vhalwadze vha COVID-19 vhane vha vha kha mitshini ya tshithusamufemo ngomu kha wadi dza vhalwadze vhane vha khou lwalesa.

4.5. Khabinethe yo dovha hafhu ya ṱanganedza vhubindudzi vhune ha kha ḓi bva u itwa zwenezwino nga vhamagi vha mimoḓoro, vha ha Isuzu Motors kha ikonomi ya shango.   Vha khamphani ya zwa mimoḓoro ya ha Isuzu Motors fhano Afrika Tshipembe vho rwela ṱari ḽimaga ḽa vhubveledzi ha mimoḓoro fhaḽa Struandale hune ha vha ngei Gqeberha. Vha ha Isuzu vha khou bindudza masheleni a linganaho R1.2 biḽiioni kha mbekanyamushumo yavho ya lushaka lu ḓaho lwa mimoḓoro ya luṱanḓala fhano Afrika Tshipembe vha tshi itela mimaraga ya fhano Afrika Tshipembe na ya mashango a re tshipembe ha soga ḽa Sahara.

4.6. Ḽimaga iḽi ḽa vha ha Isuzu ḽi ḓo sika mishumo ya vhukuma i linganaho 1 000 kha mishumo ine ya ḓo vha i tshi khou itwa ngei Gqeberha na kha netiweke yavho ya vharengisi vha zwiendedzi zwenezwo vha fhano hayani na vha mashangoḓavha, khathihi na mishumo i linganaho 25 000 kha vharengisi vha zwiendedzi vha maḓana u mona na shango.

4.7. Vhubindudzi uvhu vhuraru haho hoṱhe, vhu ḓo engedza kha mbekanyamushumo ya vhubveledzi ha fhano hayani ye ya ḓivhadzwa kha Pulane ya Mvusuludzo na Mbuedzedzo ya Ikonomi ye ya rwelwa ṱari nga Muhulisei Phresidennde Vho Cyril Ramaphosa nga ṅwedzi wa Tshimedzi 2020. Vhubindudzi hovhu vhu ḓo engedza masheleni a dzibiḽioni dza dzirannda a vhubveledzisi nga ṅwaha kha zwibveledzwa zwoṱhe zwa shango fhano Afrika Tshipembe. Vhuvhili ha vhubindudzi uvhu ndi he ha fulufhedziswa kha Muṱangano wa zwa Vhubindudzi wa Afrika Tshipembe wo fhiraho nahone mamaga aya ndi ane zwazwino o no thoma na mushumo wa vhubveledzisi zwine zwenezwo zwa khou sia ho vha na u sikwa ha mishumo miswa minzhi.

5. Khumbelo dza Tshikimu tsha Thuso ya zwa Masheleni a Matshudeni tsha Lushaka (NSFAS) kha ṅwaha wa 2022   

5.1. Khabinethe i khou tsivhudza vhagudi na vhaswa vhane vha sa tsha vha zwikoloni vha bvaho kha miṱa i shayaho na ya vhashumi vhane vha ḓitika nga muholo wa ṅwedzi uri vha rumele khumbelo dzavho dza zwa masheleni a u guda hu tshi itelwa ṅwaha wa u guda wa 2022. Khumbelo dza masheleni a u guda a NSFAS dzi ḓo vala nga Ḽavhuṱanu, ḽa 7 Phando 2022.

5.2. Maitele aya a u ita khumbelo o vulelwa na kha matshudeni vhane zwazwino vho no ḓiṅwalisa kha zwiimiswa zwa pfunzo, fhedzi vha wanala vha si na masheleni a u guda ngeno vha tshi tewa nga u wana thuso ya zwa masheleni a u guda a NSFAS.

5.3. U wana mafhungo nga vhuḓalo nga ha uri vha nga ita hani khumbelo dza thuso ya zwa masheleni a u guda, kha vha founele kha 08000 67327 kana vha dalele www.nsfas.org(link is external).

6. Khakhathi dzo ḓitikaho nga mbeu na mabulayo a vhafumakadzi (GBVF)

6.1. Khabinethe yo ṱanganedza tshigwevho tsha u valelwa dzhele vhutshilo hoṱhe kararu tshe tsha ṋetshedzwa kha muiti wa zwiito zwa u tshipa na muvhulahi Vho Mfanasibili Cornelius Mnisi (29) nga Khethekanyo ya Khothe Khulwane ya Mpumalanga ngei Mbombela zwenezwino. Hetshi tshigwevho tshi konḓaho ngaurali tshi tou vha tsumbo ya u sa konḓelela na luthihi zwiito zwa GBVF nga vha sisṱeme ya vhulamulanyi ha zwa vhugevhenga.

6.2. Nga tshumisano na mapholisa khathihi na maṅwe mazhendedzi a khombetshedzo ya zwa mulayo, ri nga ita uri zwiṱaraṱa khathihi zwitshavha zwashu zwi vhe zwo tsireledzeaho kha vhoṱhe. Ri tea u fhaṱuwa roṱhe ra vhiga zwiwo zwoṱhe zwi elanaho na zwiito zwa GBVF kha mapholisa kana ri founele kha Senthara ya Ndangulo ya GBVF ya Lushaka kha 0800 428 428 kana kha Nomboro ya Luṱingo ya u Fheliswa ha Zwiito zwa Dzikhakhathi dzo ḓitikaho nga Mbeu kha 0800 150 150/*120*7867#.

6.3. Muvhuso u ḓo shela mulenzhe kha vhuṱambo ha Maḓuvha 16 a Nndwa ya u Lwa na Zwiito zwa Dzikhakhathi zwi itelwaho Vhafumakadzi na Vhana – u bva nga ḽa 25 Lara (Ḓuvha ḽa Dzitshaka ḽa u Lwa na Zwiito zwa Dzikhakhathi zwi itelwaho Vhafumakadzi) u swika nga ḽa 10 Nyendavhusiku (Ḓuvha ḽa Pfanelo dza Vhathu ḽa Ḽifhasi) – u itela u engedza nḓivho nga ha thaidzo ya GBVF kha shango.

7. Vhulamukanyi kha zwipondwa zwa mabulayo a tshifhinga tsha muvhuso wa khethululo

7.1. Khabinethe yo ṱanganedza nḓivhadzo ya zwenezwino nga Minisṱa wa Muhasho wa Vhulamukanyi na Tshumelo dza Vhululamisi Vho Ronald Lamola ya u vhumbwa ha tshigwada tsho khetheaho tsha vhaṱoḓisisi na vhatshutshisi vha muvhuso tshine tsha ḓo tou sedzana na milandu ine a i athu tandululwa ya tshifhinga tsha Khomishini ya Ngoho na Vhupfumedzani. 

7.2. Tshigwada itshi tsho khetheaho tshi ḓo ṋewa mushumo wa u sedzana na mabulayo ane a sa ṱanganedzee u ya nga mulayo e a itwa nga mapholisa vha zwa vhutsireledzi vha muvhuso wa khethululo. Maga aya a ḓo thusa kha u ita uri zwa u wana thandululo ya tshoṱhe hu tshi itwelwa miṱa ya zwipondwa zwa mabulayo aya a tshifhinga tsha muvhuso wa khethululo zwi itwe nga tshihaḓu.

8. Tshiimo tsha zwa polotiki ngei kha Sango ḽa Eswatini

8.1. Khabinethe yo dzhiela nṱha khathihi na u ṱanganedza zwa u dzhenelela ha Muhulisei Phresidennde Vho Ramaphosa – kha vhuimo havho sa Mudzulatshidulo wa Tshiimiswa tsha zwa Polotiki, Tshumisano kha zwa Vhupileli na Vhutsireledzi tshi re nga fhasi ha dzangano ḽa Tshitshavha tsha Mveledziso tsha Tshipembe ha Afrika (SADC) kha nyimele ya zwa polotiki afho kha Shango ḽa Eswatini.

8.2. Muṱangano wa Phresidennde Vho Ramaphosa na Muṱhomphei Khosi Vho Mswati III nga Ḽavhuvhili ḽa 2 Lara 2021, ndi une wa khou tevhela madalo henefho Shangoni nga Vhurumelwa ho Khetheaho nga ḽa 21 na 22 Tshimedzi 2021. Phresidennde, kha vhuimo havho sa Mudzulatshidulo wa Tshiimiswa tsha Vhararu tsha SADC tsho vhumbwaho nga shango ḽa Namibia (mudzulatshidulo ane a khou ḓa), Afrika Tshipembe (mudzulatshidulo wa zwino) na Botswana (mudzulatshidulo ane a khou bva) – vho ṋea ndaela ya uri Vhurumelwa ho Khetheaho vhu ambedzane na vha Shango ḽa Eswatini nga ha tsireledzo na zwine zwa khou bvelela siani ḽa polotiki henefho kha shango. 

8.3. Khabinethe yo ṱanganedza thendelano dza uri Shango ḽa Eswatini ḽi ḓo ḓidzhenisa kha maitele o livhiswaho kha u thomiwa ha foramu ya nyambedzano dza lushaka. Khabinethe i khou ita khuwelelo kha vhashelamulenzhe vhoṱhe vha kwameaho vhukati ha vhadzulapo vhoṱhe vha Maswazi ya uri vha shumisane u itela u fhelisa khakhathi na khuḓano khathihi na uri vha ite uri hu dzule hu na mulalo na vhudziki henefho shangoni.  

B. Mulayotibe

1. Mulayotibe wa Khwiniso ya Mulayo wa zwa Vhugevhenga (Maitele a zwa Vhufogisi) wa 2021

1.1. Khabinethe yo ṱanganedza zwa u rumelwa ha Mulayotibe wa Khwiniso ya Mulayo wa zwa Vhugevhenga (Maitele a zwa Vhufogisi) wa 2021 ngei Phaḽamenndeni uri u dzudzanyiwe. Khwiniso dzine dza khou dzinginywa dzi ṋetshedza tshikhala tsha maitele a u kombetshedza zwa u dzhiiwa ha sambula dza DNA (sambula dzi bvaho kha tsikila dza nga ngomu ha luṱaha lwa muthu) u bva kha vhathu vhe vha gwevhiwa nga fhasi ha milandu ya Sheduḽu ya 8.

1.2. Milandu ya Sheduḽu ya 8 ndi ine ya katela milandu ya zwa vhudzekani, vhufhura, u rengisa vhathu na milandu ya u vhulaha u songo ḓiimisela. Sambula dzo kuvhanganywaho dzi ḓo thusa kha vhutshutshisi ha vhatshinyi vhane vha khou tou dovholola u ita milandu.

1.3. Mulayotibe uyu u ḓo dovha hafhu wa ita uri hu kone u thomiwa na dathabeizi yo fhelelaho ya zwa vhufogisi ha DNA u itela u khwaṱhisa nndwa ya u lwa na vhugevhenga nga u maanḓafhadza mapholisa nga vhuṱanzi ha u ita ṱhoḓisiso na u tandulula milandu mihulwane ya vhugevhenga.

C. Vhuṱambo vhune ha khou ḓa

1. Tshitatamennde tsha Mbekanyamaitele ya Mugaganyagwama wa Vhukati ha Ṅwaha (MTBPS)

1.1. Minisṱa wa Gwama Vho Enoch Godongwana vha ḓo ṋetshedza MTBPS yavho Phaḽamenndeni nga Ḽavhuṋa, ḽa 11 Lara 2021. Tshitatamennde tshi ḓo bvisela khagala tshanduko kha mugaganyagwama wa lushaka u itela uri masheleni a lushaka a kone u shumiswa zwavhuḓi nahone lwa tshifhinga tshilapfu.

1.2. MTBPS dzi bvisela khagala pulane dza lushaka dza u fhelisa khaedu kha ikonomi dze dza ḓiswa nga mulandu wa masiandaitwa a COVID-19 dza dovha dza tandulula thaidzo dza tshivhumbeo tsha ikonomi lwa tshifhinga tshilapfu.

1.3. MTBPS i dovha hafhu ya vha khuwelelo ya uri hu vhe na tshumisano kha sekhithara dzoṱhe dza tshitshavha u itela u alusa ikonomi na u sika mishumo. Khabinethe i na fulufhelo ḽa uri MTBPS i ḓo dovha hafhu ya sumbedza vhuḓiimiseli ha muvhuso kha u fhaṱa ikonomi yo khwaṱhaho nga u shumisa vhupfiwa u bva kha sekhithara dzoṱhe dza tshitshavha.

D. Mulaedza

1. U fhululedza

Khabinethe yo rumela milaedza yayo ya u fhululedza na u tamela mashudu kha:

Mufumakadzi Vho Lalela Mswane (24), kha u nangwa havho sa Miss South Africa 2021 nga ḽa 16 Tshimedzi ngei Cape Town. Gundo ḽavho ndi khwaṱhisedzo ya uri mvelaphanḓa i nga swikelwa nga u ḓiimisela na u shuma wo khwaṱhisa.

E. U tholwa

1. Vho Robert Nkuna, vhane khonṱhiraka yavho sa Mulangi Muhulu (DG) kha Muhasho wa Vhupulani, Vhulavhelesi na Tsenguluso yo engedzwa lwa tshifhinga tsha miṅwaha miṱanu.

2. Vho Robert Mooketsa Ramasodi sa DG kha Muhasho wa zwa Vhulimi, Mbuedzedzo ya Mavu na Mveledziso ya Mahayani.

3. Mufukadzi Vho Mohlago Flora Mokgohloa sa DDG: Bayodaivesithi na Tsireledzamupo kha Muhasho wa zwa Maḓaka, Vhureakhovhe na Mupo.

4. Mufumakadzi Vho Rirhandzu Sharon Mashava sa DDG: Vhupulani ha zwa Vhuendi ho Ṱanganelaho kha Muhasho wa Vhuendi.

5. Mufumakadzi Vho Mameetse Primrose Masemola sa DDG: Vhupulani ha Vhubindudzi kha zwa Themamveledziso – Themamveledziso Afrika Tshipembe kha Muhasho wa Mishumo ya Muvhuso na Themamveledziso (DPWI).

6. Mufumakadzi Vho Carmen Joy Abrahams sa DDG: Mbekanyamushumo ya Mishumonyengedzedzwa ya Muvhuso kha DPWI.

Khabinethe yo khwaṱhisedza u tholwa ha miraḓo ya Bodo nga murahu ha tsenguluso ya ndalukano dzavho na u ṱanzwiwa havho madzina nga nḓila yo teaho.

7. Bodo ya vhalangi vha Koporasi ya Vhubindudzi ha Muvhuso:

(i) Dokotela Vho David Masondo (Mudzulatshidulo);
(ii) Vho Frans Baleni;
(iii) Mufumakadzi Vho Ntombifuthi Mtoba;
(iv) Mufumakadzi Vho Tryphosa Ramano;
(v) Phrofesa Vho Bonke Dumisa;
(vi) Mufumakadzi Vho Esther Barbara Watson;
(vii) Mufumakadzi Vho Beverly Bouwer;
(viii) Vho Mongwena Mugwena Maluleke;
(ix) Vho Walter Hlaise;
(x) Vho Lufuno Mulaudzi;
(xi) Vho Abel Sithole;
(xii) Vho Brian Mavuka; na
(xiii) Mufumakadzi Vho Makano Mosidi.

8. Khabinethe yo dzhia tsheo ya u tevhedza ndaela ya khaṱhulo ya khothe ye ya ita khaṱhulo ya u vhuedzedzwa mushumoni ha miraḓo ya Bodo ya vhalangi vha Umgeni Water.

(i) Mufumakadzi Vho Ziphozethu Mathenjwa (Mudzulatshidulo);
(ii) Phrofesa Vho Thandwa Mthembu;
(iii) Vho Siboniso Shabalala;
(iv) Vho Mduduzi Eric Zakwe;
(v) Mufumakadzi Vho Chamane Nompumelelo Beata;
(vi) Vho Visvin Reddy;
(vii) Vho William Mapena;
(viii) Vho Teboho Nkhahle;
(ix) Mufumakadzi Vho Linda Ngcobo;
(x) Mufumakadzi Vho Bongekile Zulu;
(xi) Vho Suleman Badat;
(xii) Mufumakadzi Vho Mbali Barbara Ndlovu; na
(xiii) Muambeli Vho Simosenkosi Chamane.

Mbudziso:
Mufumakadzi Vho Phumla Williams
Luṱingothendeleki: 083 501 0139