A.  Xiyimo xa Khabinete eka Timhakakulu

1. Khomferense ya Vuvekisi ya Afrika-Dzonga (SAIC)

1.1.  Khabinete yi amukelele mahetelelo lama fambeke kahle ya SAIC ya vumune leyi khomeriweke eSandton Convention Centre, eJoni hi Ravumune, 24 Nyenyankulu 2022, leyi yi voneke vavekisi va laha tikweni na va le matikweni ya misava va tiboha ku humesa timali etikweni ra ka hina.

1.2.  Tiko ra ka hina ri kume 80 wa timali ta vutiboheleri ta vuvekisi leti ti endleke ntsengo wa R332 wa tibiliyoni. Leswi swi yisa vuvekisi hinkwabyo lebyi ku tibohiweke eka R1.14 wa tithiriliyoni, leswi swi nga yimeliki ntsena 95 wa tiphesente ta mpakaniso wa hina wa vuvekisi, kambe swi tlhelaka swi hi veka eka ndlela yo tiya ya ku hundzisa mpakaniso wa hina wa vuvekisi wa R1.2 wa tithiriliyoni eka ntlhanu wa malembe. 

1.3.  Vutiboheleri lebya vuvekisi byi tiyisisa xiyimo xa tiko ra ka hina tanihi ndhawu leyi kongomiwaka ya vuvekisi leyi nga hlawuriwaka.

1.4.  Kutafika sweswi, R316 wa tibiliyoni ti vekisiwile eka 47 wa tiphurojeke leti ti hetiweke na 57 wa tiphurojeke tin'wana leti ta ha riki eku akiweni.  Khabinete yi lemuka ku humelela ka timali ta vutiboheleri ta nkarhi lowu nga hundza tanihilaha ti vikiweke hakona eka Khomferense leyi, leti angarhelaka exikarhi ka swin'wana vuswikoti bya ntshovelo byintshwa eka tisekitara to hambanahambana to tanihi ta mimovha, ntshovelo wa swakudya, vumaki bya mirhi na tisenthara ta xidijitali.

1.5. Khabinete yi kombele tisekitara hinkwato ta rixaka ku seketela miphalalo leya nkoka swonghasi loko hi ri karhi hi tirhisana ku tlherisela endzhaku mpimo wa mpfumaleko wa mitirho, lowu wu khandziyeke kufika eka 35.3 wa tiphesente, hi ku ya hi mivuyelo ya Mbalango wa Nhlayo ya Vatirhi wa Kotara na Kotara lowa ha ku humesiwaka hi Tinhlayonhlayo ta Afrika-Dzonga. 

2. Ku Herisiwa ka Xiyimo xa Rixaka xa Mhangu 

2.1. Khabinete yi tlhele yi amukela ku herisiwa ka Xiyimo xa Rixaka xa Mhangu leswi tivisiweke hi Phuresidente Cyril Ramaphosa hi Musumbhunuku, 4 Dzivamisoko 2022. Ndzimakulu leyi yi endliwile yi koteka hi nkondzelelo wa vanhu lava nga eAfrika-Dzonga lava va landzeleleke milawu ya vuhlayiseki ya Vuvabyi bya Khoronavhayirasi (COVID-19) leyi endliweke hi mfumo ku ponisa vutomi na vutihanyisi.

2.2. Ntungukulu lowu kusuka sweswi kuya emahlweni wu ta lawuriwa hi ku landza Nawu wa Rihanyo wa Rixaka, 2003 (Nawu wa 61 wa 2003). Swinawana swa rihanyo swa mpfapfarhuto leswi swi nga ta letela Nawu lowa Rihanyo wa Rixaka wa 2003 swi pfuriwile leswaku vaaki va nyika mavonelo kufikela 16 Dzivamisoko 2022. 

2.3. Khabinete yi tsundzuxe vanhu hinkwavo etikweni ku ya emahlweni va teka magoza yo sivela lama faneleke ku tisirhelela hina vini na van'wana ehenhla mitluletavuvabyi ya COVID-19. Leswi swi katsa ku hlamba swandla swa hina nkarhi na nkarhi hi mati na xisibi kumbe ku tirhisa sanithayizara leyi nga na xihoko xa 70%, ku ambala masiki leyi yi funengetaka nhompfu na nomu loko hi ri endzeni ka miako, ku siya mpfhuka exikarhi ka vanhu lowu hlayisekeke wa ku ringana mpimohansi wa mitara yin'we, ku pfula mafasitere ku endlela nkhuluko wa moya na ku sawutisiwa.

2.4. Misawutiso ya COVID-19 yi tirha kahle eka ku sivela vuvabyi byo tikisa, ku amukeriwa exibedhlele na hambi rifu. Tisirhelele wena na na varhandziwa va wena hi ku endzela ndhawu ya nsawutiso ya le kusuhisuhi na wena ku sawutisiwa mahala, hambiloko u nga kombelangi nkarhi wa ku tivonakarisa.

3.  Ndzhurho kuya eka vuhaxi bya xidijitali

3.1. Ku tlheriseriwa endzhaku ka Siku ro Tima Analogo kusuka eka 31 Nyenyankulu kuya eka 30 Khotavuxika 2022 swi nyika nkarhi wo ringanela eka mfumo ku hetisa ku vekeriwa ka mabokisi ya tintambhu (tiSTB) ya miti leyi yi tsariseke wa ha ri nkarhi naswona yi nga na mfanelo ya ku ma kuma ku nga si timiwa analogo.

3.2. Ndzawulo ya Vuhlanganisi na Tithekinoloji ta Xidijitali yi ta tiyisisa leswaku miti ya 507 251 hinkwayo leyi tsariseke hi kwalomu ka 31 Nhlangula 2021 yi vekeleriwa ku nga si hundza 30 Khotavuxika 2022. Miti ya 260 868 leyi yi tsariseke exikarhi ka 31 Nhlangula 2021 na 10 Nyenyankulu 2022 yi ta vekeleriwa tiSTB ta yona hi kwalomuya ka 30 Ndzati 2022.

3.3. Khabinete ya tshemba leswaku ku hetiwa ka phurosese leyi swi ta seketela phurosese ya ndzhurho wa xidijitali na ku humesiwa loku nga ta landzela ka magandlati ya xihondzo xa le henhla.

4.  Ku lwisana na vugevenga na vukungundzwana 

4.1.  Khabinete yi hoyozele Khomixanari wa Rixaka wa Maphorisa lontshwa, Jenerala Sehlahle Fannie Masemola, endzhaku ka ku thoriwa ka yena sweswinyana hi Phuresidente Ramaphosa. Jenerala Masemola u na rhekodo ya kahle swinene ya mifikelelo eka vuphorisa eAfrika-Dzonga hinkwayo.

4.2.  Khabinete yi amukele ku swileriso swa nhlayiso leswi nyikiweke Yuniti yo Tekela Nhundzu ya Vulawuri byo Chuchisa bya Rixaka (NPA) hi Khoto ya le Henhla ya Gauteng ehenhla ka lava khumbekaka eka ‘ku hakelela’ ku xaviwa ka Mugodi ya wa Malahla wa Optimum hi R2.1 wa tibiliyoni hi 2016 hi khamphani ya Tegeta Exploration and Resources ya ndyangu wa ka Gupta.

4.3.  Swiboho leswi, leswi swi kombisaka endlelo leri hlanganeriweke ro tirha kahle ra NPA na Xiyengetsongo xa Vulavisisi bya Vulavisisi bya Vugevenga bya Xirhangana bya Vukorhokeri bya Maphorisa bya Afrika-Dzonga, swi rhumela xihungwana xo tiya hi mayelana na vuswikoti lebyi kulaka bya mfumo ku tirhana na ku Tekiwa ka Vulawuri bya Mfumo hi Swiyenge swa le Tlhelo na ku tiyisisa leswaku ku va na vutihlamuleri bya lava va khumbekaka – na ku tekela, ku kuma na ku vuyisela mali leyi yiviweke.

4.4.  Eka ku endla leswaku lava khumbekaka eka vukungundzwana va tihlamulela, Khabinete yi tlhele yi amukela vuahluri hi Khoto ya Vugevenga ba Xibindzu ya Palm Ridge eGauteng ehenhla ka khale ka mulawuri wa timali wa Eskom eka ku endla vumbabva eka khamphani leya gezi bya R35 wa timiliyoni hi ku rhekoda tiinivhoyisi ta vuxisi eka vutleketli bya malahla na matshalatshala ya ku kuma timali leti yiviweke. 

4.5.  Tanihi ndzimakulu ya nkoka eka nyimpi ya rixaka ehenhla ka vukungundzwana, Khabinete yi amukele ku hundzisiwa ka xiphemu xa vumune xa Khomixini ya Vuavanyisi ya Vulavisisi eka Xiviko xa ku Tekiwa ka Vulawuri bya Mfumo hi Swiyenge swa le Tlhelo. Phuresidente Ramaphosa u ta andlalela  Palamende miphalalo ya ku tirhisa swibumabumelo swa khomixini leyi loko a rhumela xiviko hi vutalo hi kwalomu ka 30 Khotavuxika 2022. 

5. Samiti ya Matiko Manharhu ya Xiyenge xo ka xi nga Tolovelekangi ya Muganga wa Nhluvukiso wa le Dzongeni wa Afrika (SADC)

5.1.  Khabinete yi amukele mivuyelo ya Samiti ya Matiko Manharhu ya Xiyenge xo ka xi nga Tolovelekangi xa SADC leyi khomeriweke ePitori hi Musumbhunuku, 4 na Ravumbirhi, 5 Dzivamisoko 2022. Afrika-Dzonga yi rhurhele samiti leyi tanihi Mutshamaxitulu wa Xiyenge xa SADC hi mayelana na Ntirhisano wa Tipolitiki, Vusirheleri na Nhlayiseko. Nkarhi wa ku khoma hofisi wa tiko wu famba kusuka hi Mhawuri 2021 kufika hi Mhawuri 2022.

5.2.  Exikarhi ka swin'wana, samiti leyi yi kume Ntirhokulu wa SADC eka xiyenge xa ndzima ya le Mozambique (SAMIM). SAMIM yi rhumeriwile ku ya seketela Mozambique ku ya herisa vutherorisi na swiendlo swa maseketelelo yo tlula mpimo lama nga na madzolonga. 

6. Ikhonomi 

6.1.  Khabinete yi amukele ntlakuso wa ejensi yo pima swikweleti wa Moody's  wa mavonelo ya yona ya Afrika-Dzonga kuya eka ntshamiseko kusuka eka nsuso na xiboho xo tiyisisa mipimo ya swikweleti ya mali ya tiko ya matiko mambe na ya laha tikweni ya Afrika-Dzonga eka ‘Ba2’. 

6.2.  Ntlakuso lowu wu tiyisisa ntirho wa mfumo ku vuyisela vuyisekamahlweni eka timali ta mfumo ta tiko, leswi swi seketeriwaka hi nhlengeleto wa malinhlangeleto wo tlula lowu languteriweke. 

6.3.  Mivuyelo ya malinhlengeleto ya nkarhi wa Dzivamisoko 2021 kufika eka Nyenyankulu 2022, yi kombe leswaku Vukorhokeri bya Xibalo bya Afrika-Dzonga byi hlengelete kutlula R1.5 wa tithiriliyoni. Swi yimela antswiso wa 25 wa tiphesente eka lembe leri nga hundza na ntlakuko wa 15 wa tiphesente eka lembe leri nga hundza ku nga si va na ntungukulu wa COVID-19.

6.4.  Mfumo wu le ku tirhiseni ka malinhlengeleto yo engetela ku hatlisisa ntshamiseko wa swikweleti na ku tirhana na swidingo swa vanhu, ku tlakusa ku tumbuluxiwa ka mitirho hi ku tirhisa Pfhumba ra Mitirho ya Vantshwa ra Phuresidente, na ku seketela sekitara ya rihanyo ra vaaki.

7.  N'hweti ya Ntshunxeko

7.1.  Afrika-Dzonga nan'waka yi tlangela N'hweti ya Ntshunxeko hi Dzivamisoko hi ntshembo lowu pfuxeleriweke ku kuma vumundzuku byo antswa, ku ri karhi ku kondzeleriwile malembe mambirhi yo tsana ehansi ka ntungukulu wa COVID-19 wa misava hinkwayo. Siku ra Ntshunxeko ra lembe na lembe ri ta tlangeriwa hi Ravunharhu, 27 Dzivamisoko 2022.

7.2.  N'hweti ya ntshunxeko yi tsundzuka na ku losa hinkwavo lava vutipfumati bya vona byi endleke swi endleka eka hina ku tiphina hi timfanelo ta ximunhu na mitshunxeko leyi kumekaka eka Vumbiwa ra Rhiphabuliki ya Afrika-Dzonga ra 1996 ra hina leri xiximiwaka misava hinkwayo.  

7.3.    Khabinete yi kombele vanhu va Afrika-Dzonga hinkwavo ku tirhisana tanihiloko hi ya emahlweni na nyimpi ya hina ya ku hlula nkhumbo wa COVID-19. Hinkwerhu hi dinga ku tirha xiphemu xa hina ku vuyisela ikhonomi ya hina ematshan'weni, hi ku tirhisa Kungu ra ku Akiwa hi Vuntshwa na Nhlakarhelo wa Ikhonomi, na ku kurisa mabindzu yo tala ku kota ku tumbuluxa mitirho yo tala.

8.  N'hweti yo Kwetsima ya Ramadan 

8.1. Khabinete yi navelele muganga wa Mamuzilamu wa Afrika-Dzonga N'hweti yo Kwetsima ya Ramadan leyi nga na mikateko. Ramadan yi funghiwa lembe na lembe emisaveni hinkwayo hi xikhongelo, ku titsona na swiendlo swa vuhanani. Muganga wa Mamuzilamu i xiphemu xa nkoka swonghasi xa ku hambana ka hina ka rixaka na vumunhuhati bya hina bya rixaka.

B.  wiboho swa Khabinete

1.   Kungukulu ra Nhluvukiso wa Mabindzu Lamatsongo lama Pfanganisiweke ra Rixaka ra Mpfapfarhuto (NISED)

1.1.    Khabinete yi pasise nkandziyiso wa Kungukulu ra NISED ra Mpfapfarhuto leswaku vaaki va nyika mavonelo.  Qhinga leri Pfanganisiweke ra Vun'wamabindzu na Mabindzu Lamatsongo ro sungula ri amukeriwile hi 2005. Qhinga na NISED leyi nga landzela swi humelerisa Phepha ra Swibumabumelo ra Mfumo ra 1995 hi mayelana na Qhinga ra Rixaka ra Nhluvukiso na Nkondletelo wa Mabindzu Lamatsongo eAfrika-Dzonga.

1.2.    Xikan'wekan'we loko ri amukeriwile NISED yi ta siva Qhinga leri Pfanganisiweke ra Vun'wamabindzu na Mabindzu Lamatsongo ra nkarhi wa sweswi. Ri ta nyika rimba ro tirhisana eka vatlangaxiavekulu va ikhosisiteme hinkwavo eka nhluvukiso wa mabindzu lamatsongo. Ri letela ndlela yo kondletela leswaku va ta letela minongonoko hinkwayo leyi yi seketelaka mabindzu lamatsongo.  

1.3.    Qhinga leri ri lava ku engetela vutekaxiave bya mabindzu lamatsongo eka ikhonomi ya ximfumo, ri herisa milawu yo tikisa na ku kondletela ku olova ka ku endla bindzu, ngopfungopfu eka van'waswibindzwana.

1.4.    NISED i xikumiwa xa nkanerisano wo angarhela na tindzawulo leti fambelanaka eka swiyenge swa mfumo swa rixaka, swa swifundzakulu na swa miganga, mabindzu, vatirhi, swidyondzeki na mihlangano leyi fambelanaka yo hambanahambana.

2.  Ku katsiwa ka Ejensi ya Timali ya Mabindzu Lamatsongo (SEFA) na Ejensi ya Nhluvukiso wa Tibangi leti Tirhisanaka (CBDA) ku va Ejensi ya Nhluvukiso wa Mabindzu Lamatsongo (SEDA)

2.1.  Khabinete yi pasise nkarhi wo engetela wa 20 wa tin'hweti eka ku hlanganisiwa ka mavandla lamambirhi, SEFA na CBDA, ya va SEDA. Xihlanganisiwa lexi ekusunguleni a xi endleriwile ku sungula ku tirha hi siku ra 1 Dzivamisoko 2022. Leswi vile endzhakukaloko Khabinete yi pasise swihlanganisiwa leswi ku tiyisisa leswaku mfumo wu nyika vandla rin'we leri ri nga ta seketela ntirho wa rona eka ku seketela mabindzu ya le xikarhi na mabindzunhlanganelo.

2.2.  Ku engeteriwa loku pasisiweke ku ta kotisa Ndzawulo ya Nhluvukiso wa Mabindzu Lamatsongo ku hetisisa nkambisiso wa milawu ku nyika mbangu lowu nga enawini wa kahle na ku va na pholisi lowu wu pfumelelaka ku vumbiwa ka vandla rin'we – SEDA. Vandla rin'we leri nga na swipfuno swo ringanela ri ta nyika nseketelo lowu olovisiweke swinene eka mabindzu ya le xikarhi ka mabindzunhlanganelo. Khabinete yi tlhele yi pasisa ku thoriwa ka Tibodo ta Valawuri ta nkarhinyana ta SEFA na SEDA.

3.  Swinawana leswi fambelanaka na Nsirhelelo, Nkondletelo, Nhluvukiso na Malawulelo ya Vutivi bya Xintu (swinawana swa IK) 

3.1.  Khabinete yi pasise nkandziyiso wa swinawana swa IK leswaku vaaki va nyika mavonelo. Swinawana leswa IK swi ta humelerisa ku tirhisiwa ka Nawu wa IK, 2019 (Nawu wa 6 wa 2019).

3.2.  Nawu lowu wu lulamisela nsirhelelo, nkondletelo, nhluvukiso na malawulelo ya vutivi bya xintu. Wu lulamisela ku tumbuluxiwa ka tisisiteme ta IK ta rixaka; malawulelo ya timfanelo ta IK ya miganga. Wu tlhela wu lulamisela ku tumbuluxiwa ka phanele yo tsundzuxa; ku tekeriwa enhlokweni ka tidyondzo ta nkarhi lowu nga hundza; ku humelerisiwa na ku kondleteriwa ka IK. 

3.3.  Exikarhi ka swin'wana, swinawana leswi ringanyetiwaka swi tirhana na ku tumbuluxiwa ka Phanele yo Tsundzuxa; tiphurosese to nyika mpfumelelo wo tirha; ntsariso wa vuswikoti bya vatirhi va IK; hilaha ku hlahluviwaka kumbe ku tirhisiwaka hakona IK na ku hlayisiwa ka marhijisitara ya IK. Swinawana leswi swi ta tlhela swi lulamisela tindlela to tshunxa mikwetlembetano.

3.4.  Swinawana leswi swi ta gazetiwa naswona swi nga tlhela hlahluviwa hi ku tirhisa webusayiti ya Ndzawulo ya Sayense na Vutumbuluxi: www.dsi.gov.za. Swi ta tlhela swi kumeka hi tindzimi ta ximfumo hinkwato.  

4.  Rimba ra Ntirhisano ra Nhluvukiso lowu Yisekaka Emahlweni wa Vun'we bya Tinxaka (UNSDCF) ya 2020-202D 

4.1.  Khabinete yi pasise UNSDCF ya 2020-2025 ya Afrika-Dzonga leswaku yi tirhisiwa. Rimba leri ri nyika xinakulobye xa vutihlamuleri exikarhi ka mfumo, rixaka hi ku angarhela na hofisi ya tiko ya UN eAfrika-Dzonga. 

4.2.  UNSDCF yi katsakanya mune wa tiphuphu ta swirhangana swa xiqhinga to angarhela leti faneleke ku angarheliwa (1) ku kula loku katsaka hinkwavo, ka vululami na loku yisekaka emahlweni; (2) ncinco wa rifuwo ra ximunhu na vanhu; (3) mafumelo lama tirhaka kahle, lama nga tlangisiki swipfuno na ku va yo cinca; na (4) swipfuno swa ntumbuluko leswi kondzelelaka tlilayimete na leswi lawuriwaka hi ndlela leyi yisekaka emahlweni.

4.3.  Tiphuphu leta xiqhinga ti xakelanisiwile na Kungu ra Nhluvukiso ra Rixaka ra tiko: Xivono xa 2030 na Rimba ra Xiqhinga ra le Xikarhi ka Theme, naswona ri tlhela ri xakelanisiwa na Swikongomelokulu swa Nhluvukiso lowu Yisekaka Emahlweni swa UN leswi lawuriwaka hi ku tirhisa hofisi ya tiko ya UN eAfrika-Dzonga. Nsimeko lowu wu ta endliwa hi ku tirhisa qhinga ro hlengeleta swipfuno ra nhlanganelo.

5.  Mphalalo wa rixaka eka timasipala ta Dorobakulu ra Mangaung na Miganga ya Enoch Mgijima

5.1.  Khabinete yi pasise mphalalo lowu hi ku landza Xiyenge xa 139(7) xa Vumbiwa ra Rhiphabuliki ya Afrika-Dzonga ra 1996, lexi hlayiwaka swin'we na Xiyenge xa 150 xa Nawu wa Malawulelo ya Timali ta Masipala, 2003 (Nawu wa 56 wa 2003), eka timasipala ta Dorobakulu ra Mangaung na Miganga ya Enoch Mgijima. Timasipala hatimbirhi ti hlanganile na mihluleko ya timali na ya mphakelo wa vukorhokeri yo tivikana ku ringana nkarhi wo leha.  

5.2.  Vurhangerinkulu bya Xifundzakulu xa Free State byi vekile Masipala wa Dorobakulu ra Mangaung ehansi ka mphalalo lowu bohaka hi ku landza Xiyenge xa 139(5) (a) na (c) xa Vumbiwa hi N'wendzamhala 2019. Endzhakukaswona kungu ra nhlakarhelo wa timali leri bohaka ri rhwexiwile ehenhla ka masipala lowu hi 2020. Endzhaku ka kutlula malembe mambirhi ya ku tirhisa kungu ra nhlakarhelo wa timali hi nkarhi wa mphalalo lowa xifundzakulu, Dorobakulu leri sweswi ri vekiwile ehansi ka mphalalo wa rixaka hi ku landza Xiyenge xa 139(7) xa Vumbiwa.

5.3.  Masipala wa Miganga wa Enoch Mgijima na wona wu vekiwile ehansi ka mphalalo lowu bohaka hi Vurhangerinkulu bya Xifundzakulu xa Kapa-Vuhumadyambu hi ku landza Xiyenge xa 139(5) (a) xa Vumbiwa hi 2018. Hambiswiritano, endzhakukaloko masipala lowu wu hlulekile ku khatsa ndzima eka ku antswisa matirhelo ya wona ya timali na mphakelo wa vukorhokeri, Khabinete yi bohile ku wu veka ehansi ka mphalalo wa rixaka.

5.4.  Ku tisiwa ka mphalalo wa rixaka hi ku landza Xiyenge xa 139(7) xa Vumbiwa swi vula leswaku eka timasipala hatimbirhi, mfumo wa rixaka sweswi wu ta teka goza ematshan'weni ya Vurhangerinkulu bya Xifundzakulu. Muxaka lowu wa mphalalo wa boha naswona wu landzelela endlelo ro fana tanihi Xiyenge xa 139(5) xa Vumbiwa, handle ka leswaku mfumo wa rixaka sweswi wu byarha hi ku kongoma vutihlamuleri bya miphalalo leyi. 

5.5.  Ku humelerisa ku byarhiwa loku ka vutihlamuleri, Vayimeri wa Khabinete ya Rixaka (NCR) ku nga ri khale va ta rhumeriwa eka timasipala hatimbirhi. Holobye wa Timali u ta rhumela matimba eka NCR naswona u ta tlhela a seketeriwa hi xipano xa marhaviyingi xa vativinkulu. A ku na xiboho lexi se xi tekiweke ku n'okisa khansele ya masipala hi ku landza Xiyenge xa 139(5)(b) xa Vumbiwa.

5.6.   Mphalalo lowa rixaka wu ta sungula loko wu ta va wu gazetiwile ximfumo eka Gazete ya Rixaka, hambiswiritano, mphalalo wa Xiyenge xa 139(5) wa nkarhi wa sweswi wu ta tshama wa ha tirha kufika hi siku leri. Mphalalo wa Xiyenge xa 139(1) eka Masipala wa Miganga wa Enoch Mgijima wu ta tlhela wu siviwa hi mphalalo wa Xiyenge xa 139(5) (a) na (c), lowu wu nga ta tlhela wu angarhela nhluleko wa masipala ku hetisisa miboheko ya wona ya varhangerinkulu. Holobye wa le ka Hofisi ya Phuresidente, Ttn Mondli  Gungubele – swin'we na Holobye wa Timali, Ttn Enoch Godongwana na Holobye wa Mfumontirhisano wa Timaka ta Xikaya, Dkd Nkosazana Dlamini Zuma – u ta khoma nhlengeletano yo nyika vuxokoxoko ya swihangalasamahungu vhiki leri taka ku katsakanya mphalalo lowa rixaka.

C.  Xiendleko lexi taka

1.  Xivijo xa Phuresidente xa Modlolo wa Nhluvukiso wa Swifundzatsongo (DDM)

1.1.  Phuresidente Ramaphosa u ta khoma Xivijo xa Phuresidente xa DDM eka Miako ya Mitlangu ya Petrus Molemela eMangaung, Free State hi Ravuntlhanu, 8 na Mugqivela, 9 Dzivamisoko 2022.

1.2.  Xivijo lexi, lexi rhambiweke ehansi ka nkongomelo: “Ku nga siyiwi munhu endzhaku”, xi ta hlahluva levhele ya mphakelo wa vukorhokeri eka xifundzakulu lexi, xi landzelerisa nhluvuko hi mayelana na DDM, na ku angamela miphalalokulu na makungukulu.

1.3.  Xivijo xa Phuresidente xa DDM i pulatifomo ya vutekaxiave bya mani na mani ya nkoka tanihileswi yi nyikaka vaakatiko va xona rito na Phuresidente xivandlanene xa ku yingisela vanhu na ku angula swivilelo swa vona. Vanhu va Afrika-Dzonga va ta landzelela na ku teka xiave eka mikanelo eka swihangalasamahungu swa vaaki ehansi ka hexithege #PresidentialImbizo.

D.  Vuhoyozeri

Khabinete yi hundzise vuhoyozeri bya yona na ku navelela leswinene eka: 

- Ttn Nkosinathi Maphumulo, loyi a tivekaka swinene tanihi DJ Black Coffee, loyi a ha ku winaka Grammy ya yena yo sungula eka nkhetekanyo wa “Alibamu ya Ncino/ya Xielekitironiki ya Kahle Swinene” ya alibamu ya yena ya Subconsciously, eka nkhuvu wa Masagwati ya Grammy ya vu64 lowu a wu khomeriwile eLas Vegas, United States.
 

E.  Ku thoriwa 

Ku thoriwa hinkwako ku fanele ku landzelela vutiyisisi bya mithwaso na mbhasiso lowu faneleke.

1. Ttn Mpumelelo Tyikwe tanihi Muofisirinkulu wa Vurhangerinkulu na Mulawurinkulu wa Nhlangano wa Ndzindzakhombo wa Nxungeto wo Hlawuleka wa Afrika-Dzonga.
 

Swivutiso: Phumla Williams – Muvulavuleri wa Khabinete 
Selifoni: 083 501 0139