1. Ditsibosopeonakong ka ga Mogare wa Corona (COVID-19)

1.1. Mo kopanong ya yona e e Neng e Tshwerwe ka go Dirisa Mafaratlhatlha a Thekenoloji a Ditlhaeletsano ka Laboraro, la bo 10 Seetebosigo 2020, Kabinete e amogetse pegelo ya dipeonakong go tswa go Lekgotla la Naga le le Jarileng Maikarabelo a Mogare wa Corona (NCCC). NCCC e tlhagisitse ditshitshinyo di le dintsinyana tse di ka ga kgato ya boraro ya go sekega nakwana ditiro tsa ka fa nageng.

Ditshitshinyo tseno di ikaegile ka ditshwaelo tse di tlhagisitsweng ke makala a a farologaneng le ditharabololo tse di tlhagisitsweng ke Mokgatlho wa Matlhale ka Bosenyi le Ditirelo tse di Kopantsweng wa Bosetšhaba (NATJOINTS).

1.2. Le fa go le jalo, Kabinete e tsere tshwetso ya gore e fetise kgang ya go nesetsa pula ditshitshinyo tseno go fitlha go gololwa pegelo ya tshekatsheko ya boitekanelo ka botlalo go tswa mo go Komiting e e Eletsang Ditona ka Maemo a Boitekanelo mo Seemong sa COVID-19. NCCC e solofetse go amogela pegelo ka botlalo mo bekeng e e tlang fa e roga.

1.3. Kabinete e ipoa sebedi go ikuela mo go maAforika Borwa otlhe go obamela dikgato tsa polokesego tse di leng mo tirisong tsa go lwantshana le go anama ga COVID-19. Dikgato tseno di tsenyeletsa go tlhapa diatla ka gale, go katoga batho ba bangwe le go apara dimaseke fa o le fa gare ga batho.

2. Setlamo sa Naga sa Peteroleamo

2.1. Kabinete e tsopoletswe ka tiro e e tsweletseng ya go kopanya ditlamo tsotlhe tsa peteroleamo (leokwane le gase) tseo e leng ditlamo tsa eneji tse di leng mo taolong ya puso, ka ntlha ya Central Energy Fund.

2.2. Kgato eno ya go kopanya setlamo seno e tla tlhola ditlamo di le tharo (PetroSA, Strategic Fuel Fund le iGas) gore di kopanngwe go nna Setlamo sa Naga sa Peteroleamo se le sengwe. Seno se naya mooko seo Moporesitente Cyril Ramaphosa a buileng ka sona mo Puong ya gagwe ya Maemo a Setšhaba (SoNA) ka la bo 13 Tlhakole 2020, fa a ne a re ditlamo tse di leng mo taolong ya puso di tshwanetswe go rulaganngwa sešwa gore di kgone go ka tshegetsa kgolo le tlhabololo.

2.3. Kabinete e neseditse pula kgato ya go thapa setlamo sa matlhola a dibona mo mererong ya go retolola ditlamo se se dirang bogolosegolo ka go kopanya ditlamo gore se sekaseke mekgwa e e ka re tswelang mosolo mo go kopanyeng setlamo seno go nna Setlamo sa Naga sa Peteroleamo se le sengwe.

3. Letlhomeso la Pholisi ya Tirisodikgoka e e Totileng Batho ba Bong jo bo Rileng (GBV) mo Ditheong tsa Thuto e e kwa Godimo le mo Ditheong tsa Katiso

3.1. Kabinete e neseditse pula Letlhomeso la Pholisi ya GBV mo Ditheong tsa Thuto e e kwa Godimo le mo Ditheong tsa Katiso. Letlhomeso leno la pholisi maitlhomo a lona ke go tsibogela palo e e oketsegang ya dikgetse tse di amanang le GBV mo ditheong tsa thuto e kgolwana.     

3.2. Letlhomeso leno la pholisi le tlamela ka dikeletso mo mekgatlhong e e rwalang maikarabelo, mo dikgatong tse di tsewang le mo dithulaganyong tseong ditheo tsa thuto e kgolwana di tshwanetseng go di tsenya tirisong go thibela ditiragalo tsa GBV mo dikhemphaseng. Mo godimo ga go tlamela ka mekgatlo e e rwalang maikarabelo, letlhomeso leno gape le gatelela gore ditheo tseno di tshwanetse di bee mo phatlalatseng pholisi ya bona ya GBV.

4. Pegelo ya Dipatlisiso tsa Kgonagalo ya go Aga Musiamo wa Ditiragalo tsa go Ema Kgatlhanong le Tlhaolele le tsa Kgaratlhelo ya Kgololesego (RLMM)

4.1. Kabinete e neseditse pula Pegelo ya Dipatlisiso tsa Kgonagalo ya go Aga RLMM. Musiamo ono o tla nna le seabe mo go bolokeng ditiragalo tsa mo nakong e e fetileng tse di ka ga go ema kgatlhanong le tlhaolele le tsa go kgaratlhela kgololesego mo nageng ya Aforika Borwa.

4.2. Dipatlisiso tseno, tse di neseditsweng pula ke Kabinete mo ngwageng wa 2015, di tlhagisitswe ke Porojeke ya Letsholo la Ngwaoboswa mo Ditiragalong tsa go Ema Kgatlhanong le Tlhaolele le tsa Kgaratlhelo ya Kgololesego (RLHR). RLHR e na le seabe mo go tlhabololeng le mo go refosaneng maemo mo lephateng la ngwaoboswa ka fa nageng ya Aforika Borwa.

4.3. Fa o sena go agwa, musiamo ono o tla somarela ditiragalo di le dintsi tsa ngwaoboswa (tse di ka tshwaregang le tse di ka se tshwaregeng) le go bua ka lentswe le le lengwe, mmogo le go bontsha dikgopolo le maitemogelo a a tsamaelanang le kgaratlhelo ya kgololesego mo nageng ya Aforika Borwa.

5. Letsholo la Naga la Ngwaoboswa ya Merafe ya Masarwa

5.1. Kabinete e neseditse pula kgang ya go diragatsa Letsholo la Naga la Ngwaoboswa ya Merafe ya Masarwa, e leng lefa la naga eno. Letsholo leno le tla nopola, la tsibogela, la somarela le go tlotlomatsa ngwaoboswa ya batho ba maKhoi, maNama, maGriekwa, maKhorana le maSan. Porojeke eno e na le seabe mo go amogeleng hisetori ya naga ya Aforika Borwa eo mo malobeng e neng e tlodisiwa matlho.

5.2. Kgato eno gape e diragatsa Molao wa Setso le Magosi a Merafe ya Masarwa (Molao wa bo 3 wa 2019), o o batlang gore bogosi jwa merafe ya Masarwa bo amogelwe semolao.

6. Lethathama la Mebetlo ya Madi a Tshipi a a Supang Tlotlo a Ngwaga wa 2021 le wa 2022

6.1. Kabinete e neseditse pula lethathama la mebetlo ya madi a tshipi a a supang tlotlo a ngwaga wa 2021 le wa 2022 a a tla dirisediwang go reka ka one gore a ka rebolwa ke Bankakgolo ya Aforika Borwa (SARB) e tshwarisanemmogo tiro eno le Setlamo sa Aforika Borwa sa Madi aTshipi.

6.2. Ledi la tshipi le le supang tlotlo la R5 le le tla dirisediwang go reka ka lona mmogo le Ledi la tshipi le le benyang ka selefera, le na le polata ya gauta mo go lona le le tla dirisediwang go bokelediwa ka bobedi jwa ona a tla rebolwa mo ngwageng wa 2021 e le kgato ya go keteka ngwagakgolo SARB e le teng. Lethathama la bone la Madi a Tshipi a naga ya Aforika Borwa, a a tla rebolwang mo ngwageng wa 2022 a tla tsenyeletsa madi a tshipi a 10c, 20c, 50c, R1, R2 le R5.

Melaotlhomo

1. Molaotlhomo o o Kwalolotsweng Sešwa wa Melao ya Lekala la Matlole wa Ngwaga wa 2020

1.1. Kabinete e neseditse pula dikgato tsa go tlisiwa kwa Palamenteng ga Molaotlhomo o o Kwalolotsweng Sešwa wa Melao ya Lekala la Matlole wa Ngwaga wa 2020. Molaotlhomo ono o tshitshinya gore SARB e jare maikarabelo a Bothati jwa Ditharabololo, le go matlafatsa melawanataolo ya SARB mo go diragatseng maikarabelo a yona a go netefatsa fa go na le tsepamo mo thulaganyong ya matlole.

1.2. Molaotlhomo ono o tla ka letlhomeso le lentšhwa la go rarabolola mathata mo ditheong tsa matlole, bogolosegolo mo dibankeng, fa di le mo mathateng a matlole. E tsenya tirisong gape le sekema sa ntlha sa naga ya Aforika Borwa sa ditirelo ka botlalo tsa inšorense ya madituelo a kwa dibankeng se se tla netefatsang gore fa banka e retelelwa ke go dira dituelelo batho ba ba dirileng dituelelo ba busediwa madi a bona a dituelelo.

1.3. Sekema seno se tla tswela mosola batho ba ba dirang dituelelo ba le mo tlalelong ka go netefatsa gore go nna le dikgoreletsi di le dinnyenyana fela mo thulaganyong ya matlole le mo maemong a ikonomi ka kakaretso fa ditheo tsa mothale oo di iphitlhela di le mo matsapeng a ditšhelete.

Go Thapiwa

Go thapiwa gotlhe go tla diragadiwa fa makwalothuto otlhe a netefaditswe mme go amogetswe tetlelelo e e matshwanedi.

Mme Sekgothadi Kabelo o thapilwe go nna Mokaedi yo e Seng wa Khuduthamaga wa Setheo sa Taolo ya Maemakepe sa Aforika Borwa.

Dipotsolotso: Mme Phumla Williams – Mmueledi wa Kabinete
Mogala: 083 501 0139