A.  Merero ye Bohlokwa Seemong sa Bjale

1.  Mohlagase

1.1.  Kabinete e amogetše go kaonafala ga Boemo bja Mohlagase wa Eskom wo o šetšego o le gona, wo gabjale o batamelago 70%. Dimekawate tša go balelwa 400 di tlaleleditšwe kabong ya mohlagase wa naga ebile magato a ditokišo tše di rulagantšwego a tloga a kaonafetše mo nakong ye kopana. 

1.2.   Kabinete e lemogile sephetho sa Kgoro ya Kagodithokgwa, Boreahlapi le Tikologo sa Mohlankedi wa Bosetšhaba wa go šetša Maemo a Moya go fa Eskom tumelelo ya go fega maloka a go fihlelela Dinyakwa tša Motheo tša go Tupiša Dihlahlameši Setišing sa Mohlagase sa Kusile gola Mpumalanga, ge fela go latelwa dipeelano tše itšego tšeo di tiišeleditšwego letsogo. 

1.3.  Sephetho se sa go fega dinyakwa se tla fa Eskom monyetla wa go kgona go lokiša bontši bja ditiši tšeo di senyegilego ka la 23 Diphalane 2022. Khamphani ye ya go fehla mohlagase e tlo aga ditiši tše tharo tša lebakanyana tšeo go letetšwego gore di tla buša mohlagase wa go lekana dimekawate tše 2 100 kabong ya mohlagase ya naga le go fokotša kgaotšo ya mohlagase ka magato a mabedi.

1.4.  Kabinete e tloga e gateletše gore mmušo o ikgafetše go fihlelela Diphetogo tša Enetši tša go se tšee Lehlakore (JET) le go ikemišetša go fediša ditlamorago tša phetogo ya klaemete. JET, ye e hlomilwego ka 2020, e nepile go fihlelela dihlahlameši tša go hloka khabone pele ga ngwaga wa 2050.

1.5.  Kabinete e lebogile MaAfrika Borwa ge ba tšwetše pele go šomiša mohlagase gabotse, kudukudu ka nako ya ge mohlagase o dirišwago ka bontši. Matsapa a rena a mohlakanelwa a go šomiša mohlagase gabotse a re thušitše go theošetša fase maemo a fasana a kgaotšo ya mohlagase. 

1.6.  Kabinete e amogetše gape maikgafo ao a dirilwego kua Samiting ye Mpsha ya Lefase ka Bophara ya Kwano ya Thekgo ya Ditšhelete gola Paris, France go thoma ka la 22 go fihla ka la 23 Phupu 2023. Mopresidente Cyril Ramaphosa o bile gona samiting ye, yeo e ebego e nepile go hlama kwano ye mpsha magareng ga dinaga tša Leboa le tša Borwa go thuša go rarolla merero ya phetogo ya klaemete, tlhabollo le dikoloto.

2.  Maemo a Boso a Šoro

2.1.  Kabinete e thabišitše ke Dihlophatšhomo tša Profense tša Masetlapelo ka ge ba gorogile ka tšhoganyetšo go thuša setšhaba seo se amilwego ke mafula a moragorago gola KwaZulu-Natal le Kapa Leboa. Ka moka ga rena re nyamišitšwe kudu ke bao ba lobilego maphelo a bona gola KwaZulu-Natal, ebile re lebiša mahloko a rena go malapa le bagwera ba bao ba lobilego maphelo a bona. 

2.2.  Mananeokgoparara a ditsela, kabo ya mohlagase, dipeakanyo tša kelelatšhila le dintlo mo mafelong ao a amegilego di senyegile la go šiiša mola ditsela dikarolong tše dingwe tša Kapa Leboa le tšona di senyegile maboto.

2.3.  Mmušo le mekgatlo ya go kgathalela batho e tšwelapele go fana ka didirišwa tša semeetseng tša kimollo bathong bao ba amilwego go la KwaZulu-Natal go akaretšwa le diphuthelwana tša dijo, mapai, malakane a diplastiki le mapokisana a tlhakodišo ya tšhoganyetšo. 

2.4.  Eskom le dikgoro tša mmasepala tša kabo ya mohlagase le tšona di tšwile lesolo go bušetša sekeng mohlagase mo mafelong ao a amilwego. 

3.  Ketelo ya Mohlakanelwa ya Mošomo ya go Leba ka Nageng ya Netherlands le ya Denmark 

3.1.  Kabinete e amogetše Ketelo ye e atlegilego ya Mohlakanelwa ya Mošomo magareng ga Tonakgolo ya Netherlands, Morena Mark Rutte le Tonakgolo ya Denmark, Mme Mette Frederiksen ye e matlafaditšego kamano ya Afrika Borwa le dinaga tše pedi magorong a haedrotšene ya tlhago, enetši ya go mpshafatšega gotee le JET.

3.2.  Ketelo ye e kopantše gape sehlopha sa babeeletši mo Afrika Borwa go šušumetša maemo a godimodimo a tšhomišano le dikamano tše botse magareng ga bagwebišani ba babedi ba bohlokwa ba Yuropa. 

3.3.  Nakong ya dipoledišani tša semmušo tša mohlakanelwa, Memorantamo wa Kwešišano Legorong la Haedrotšene ya Tlhago o saennwe magareng ga Afrika Borwa le Netherlands, mola kwano magareng ga Afrika Borwa le Denmark mabapi le Tšhomišano ya Tlhabollo ya go amana le Lenaneo la Tšhomišano ya Enetši la 2017 le fetošitšwe.

4.  Imbizo ya Mopresidente ya KwaZulu-Natal ya Mmotlolo wa Tlhabollo ya Dilete (DDM) 

4.1.  Mopresidente Ramaphosa o bile le baetapele ba go tšwa didikong ka moka tše tharo tša mmušo (sediko sa bosetšhaba, sa probense le sa pušoselegae), ge a be a tsenela Imbizo ya Mopresidente ya Bošupa ya DDM ya Pušo ya Boselela ka Labohlano, 30 Phupu 2023 kua Mmasepaleng wa Selete wa uThukela gola KwaZulu-Natal. Baetapele ba mmušo ba šomišitše monyetla wo go boledišana le badudi ka ditlhotlo tša go amana le kabo ya ditirelo gotee le ka dithulaganyo tša tlhabollo ya selete se.

4.2.  Kabinete e dirile boipiletšo baduding go kgatha tema ka mafolofolo go hlahla bokamoso bja mo ba tšwago gona ka go kgatha tema lenaneong la DDM la Imbizo ya Mopresidente.

4.3.  Badudi ka moka ba kgopelwa go kgatha tema tlhabollong ya badudi ba mo ba tšwago gona ka go ba badudi ba mafolofolo. Ka go šomišana mmogo, re ka kgona go hlaola merero ye e re hlobaetšago le go kgona go phaya mapheko a go šitiša kabo ya ditirelo ya mohlakanelwa.

5.  Ikonomi

5.1.  Kabinete e fetlekile Dipalopalo tša Moragorago tša Kotara le Kotara tša Thwalo Mešomong tše lokolotšwego ke ba Dipalopalo tša Afrika Borwa (Stats SA) tše laetšago go fokotšega ga thwalo mešomong mafapheng a go fapafapana le tlhatlogo go a mangwe. Le ge e le gore kgolo ye e santše e se kaalo, ikonomi ya gaborena ye e tieletšego e tšwela pele go hlola mešomo, le ge e le gore se se direga ka go nanya. 

5.2.  Magatotharollo a go swana le Lenaneo la Mopresidente la Hlohleletšo ya Tlhomo ya Mešomo le thuša go fetoša seemo se, Kabinete e filwe hlohleletšo ke gore pele ga Hlakola 2023, batho ba go feta 1,2 milione ba holegile thwi go tšwa lenaneong le ga e sale go tloga mola le thakgolwago ka 2020. Go fihla gabjale, mešomo ya lebakanyana ya go balelwa 800 000, ye bontši e lego ya baswa, e hlotšwe magorong a bohlokwa go swana le thuto, kgodišo le go hlalefišwa ga bomapimpana le polokego ya setšhaba.

5.3.  Lenaneo le le netefaditše gore MaAfrika Borwa ba bantši bao ba lego kotsing ba kgatha tema mešomong ye nago le mohola le go amogela meputso ya go se fetogefetoge. E thušitše go nolofatša maima a ikonomi a diketekete tša malapa. 

6.  Haedrotšene ya Tlhago

6.1.  Kabinete e amogetše tsebagatšo ya mohlakanelwa ya maikemišetšo a go hloma Sehlophatšhomo sa Haedrotšene sa Afrika Borwa le Germany, seo se saenetšwego ke Tona Kantorong ya Mopresidente yo a rwelego maikarabelo a Mohlagase, Ngaka Kgosientsho Ramokgopa le Motlatša Mokhanseliri Robert Habeck. Sehlophatšhomo se se tla lekola ka fao mmaraka wa haedrotšene ya tlhago o tla hlolwago le go hlabollwa, gotee le go hlola menyetla ya magareng ga dikgwebo magareng ga dinaga tše ka bobedi. Haedrotšene ya tlhago e fehlwa ka mohlagase wa go mpshafatšega ebile ka boyona e tupiša dihlahlameši tša maemo a fasefase ge e bapetšwa le haedrotšene ya go tlwaelega. 

6.2.  Mmušo o šetše o hlamile dithulaganyo tša Lesolokgoparara la Haedrotšene, leo go letetšwego gore le tla gagaba go thoma Limpopo, la phatša Johannesburg go fihla Durban. Lesolokgoparara le le tla tliša menyetla ya diprotšeke tšeo di tla hlohleletšago go thomišwa ga masolo a haedrotšene dihapong ka nepo ya go maatlafatša kgolo ya ikonomi le tlholego ya mešomo.

7.  Kopano ya Baetapele ba Dinaga le Mebušo ba Yunione ya Bofetamellwane ya Borwa bja Afrika (SACU) 

7.1.  Kabinete e lemogile Ketelo ya Mošomo ya Mopresidente Ramaphosa ya Kopano ya Boseswai ya SACU ya Baetapele ba Dinaga le Mebušo yeo e bego e swaretšwe Pušotaolong ya Eswatini ka Labone, 29 Phupu 2023. SACU, ye e hlomilwego ka 1910, ke Yunione kgalekgale ya Bofetamellwane lefaseng ka bophara.

7.2.  Samiti ye e ahlaahlile le go fana ka ditsebišo tša seemo mabapi le go phethagatšwa ga Thulaganyo ye Logetšwego Maano ya SACU ya 2022 – 2027. Thulaganyo ye ya go Logelwa Maano ya SACU e amogetšwe ka Phupu 2022 bjalo ka seakanywa sa mohlahlatsela go tiišeletša go momaganywa ga dilete ka gare ga Yunione ya Bofetamellwane le go hlola dikamano tšeo di matlafetšego magareng ga mebušo ya dinaga tše hlano tše lego maloko gotee le go šomiša ka botlalo menyetla ye e hlagišwago ke Lefelo la Kgwebo ye e Lokologilego la Kontinente ya Afrika.

8.  Meepo

8.1.  Kabinete e hlobaetšwa ke setlwaedi sa meepo ye sego molaong ebile mmušo o tšea magato a go fediša setlwaedi se ka Tsamaišo ya Bosetšhaba le ka Sehlopha sa Taolo (NCSMT). NCSMT e šetšane le go rulaganya matsapa a mmušo a go lwantšhana le meepo ye sego molaong gotee le mešikašika ya go gweba ka dimetale tša theko ya godimo.

8.2.  Meepo ye sego molaong le mešikašika ya go gweba ka dimetale tša theko ya godimo e tloga e senya ikonomi ya gaborena, ebile e nale ditlamorago tše mpe godimo ga polokego le maphelo a badudi ba mafelomabapi. 

9.  Megwanto ya setšhaba

9.1.  Kabinete e gateletše gore dikgaruru ga se tharollo ya mathata a setšhaba le go dira boipiletšo setšhabeng go šomiša magato ao a lego gona go hlagiša maswenyego a bona. Sehlophatšhomo sa Ditona se rometšwe gola Diepsloot go šomišana le baetapele ba setšhaba go mekamekana le mathata a bona ao a ba hlobaetšago. 

9.2.  Kabinete e dirile boipiletšo go badudi ba Diepsloot le ba mafelo a mangwe go šomišana le mmušo, makhanselara a fao le maphodisa go rarolla mathata a go swana le bosenyi. 

B.  Diphetho tša Kabinete

1.  Seakanywa sa Leanopeakanyo la Naga la Dipeeletšo (CIS) 

1.1.  Kabinete e dumeletše seakanywa sa Afrika Borwa sa CIS gore se phethagatšwe. 

1.2.  Seakanywa sa CIS, seo se phatlaladitšwego gore setšhaba se ntšhe sa mafahleng ka sona ka ngwaga wa 2022, se šeditše go bea naga ye seemong se maleba bjalo ka naga ye bohlokwa mo Afrika ye batho ba ka ikgethelago go beeletša go yona ka go phagamišetša godimo dipeeletšo tša thwi tše hlwahlwa tša dinagadišele le tša ka mo nageng.

1.3.  Leanopeakanyo le le ithekgile godimo ga ditlapele tša naga ye tša dipeeletšo le dinepo tše bjalo ka go oketša mešomo, go fediša bohloki, le go thekga diphetogo tša go se tšee lehlakore tša go fihlelela ikonomi ya go hloka khabone le tšhireletšego ya enetši. 

1.4.  Lona le fana le magato a go kgontšha dipeeletšo ka nepo ya go gokagoketša dikgwebopotlana, tše nnyane le tša magareng go fihlelela kgolo ya ikonomi, kudukudu ikonomi ya tlhago. Leanopeakanyo le le utolla gape le palo ye e bonagalago ya dikwano tša maphakgamantši, tša dilete le tša magareng ga dinaga tšeo di saenetšwego ke Afrika Borwa.

1.5.  Leanopeakanyo le le tsamaelana le dinepo tša Thulaganyo ya Leanotlhabollo godimo ga diphetogo tša ikonomi gotee le Thulaganyo ya 2050 ya Bosetšhaba ya Mananeokgoparara ye e sa tšogo amogelwa malobanyana mo.

1.6.  Diprofense tša naga ye le mebasepala ya tšona ya metsesetoropo e tlaba ye bohlokwahlokwa go sepediša leanopeakanyo le, leo nako le nako le tla fetošwago gore le gate ka mošito o tee le seemo sa go fetogafetoga sa ikonomi ya gaborena.

2.  Pego ya Naga ya Lekga la Boraro ka fase ga Sephetho sa Boditšhabatšhaba kgahlanong le Bohlokotsebe gotee le Tshwaro goba Dikotlo tše Dingwe tše Sehlogo le Tshwarompe ya Bophoofolo le ye Gobošago (CAT)

2.1.  Kabinete e dumeletše tlhagišo ya pego ya Afrika Borwa ya CAT ya lekga la boraro go Mongwaledipharephare wa Ditšhabakopano (UN). Pego ye e hlatholla magato ao Afrika Borwa e ya tšeago go thibela bohlokotsebe le tshwarompe ya badudi. 

2.2.  Afrika Borwa e saenetše Sephetho se ka ngwaga wa 2000 le go se dumelela ka ngwaga wa 2008. Ka go tsamaišana le Sengwalwa 17 sa Ditshepedišo tše sego tša Kgapeletšo tša CAT, ye nngwe ya ditlamego tše phethagatšwago godimo ga Bakgathatema ba Pušo ke go hloma magato a ka mo nageng a go thibela bohlokotsebe a go tsebega bjalo ka Magatothibelo a Bosetšhaba.

2.3.  Mo mengwageng ye 29 ya go feta, mmušo wa temokrasi wa ka mo Afrika Borwa o fedišitše melao ya kgale ya mmušo wa kgethollo le ditheo tša ona, wa aga ditheo tše diswa tša mmušo wa temokrasi, gotee le go hlama melao ye e ithekgilego ka ditokelo tša Molaotheo le tokologo.

2.4.  Maloko a setšhaba a kgona go bega thwi dikgononelo le tshwarompe go Lekoko le le Ikemego la Dinyakišišo tša Maphodisa (IPID) gore di nyakišišwe. Afrika Borwa e nale Komišene ya Ditokelo tša Botho ye e šomago gabotsebotse, e lego setheo sa bosetšhaba se se hlomilwego go thekga temokrasi ya go ikala ka Molaotheo. 

C.  Bao ba Thwetšwego Mešomong 

Batho ka moka bao ba thwetšwego mešomong mangwalo a bona a thuto a tlo tiišetšwa le go netefatšwa ka tsela ye maleba.

1.  Mme Ntomboxolo Mbengashe bjalo ka Mohlankediphethišimogolwane (CEO) wa Post Bank ya Afrika Borwa tekano ya mengwaga ye mehlano. 
2.  Morena Sibusiso Bukhosini bjalo ka CEO ya Isimangaliso Wetland Park Authority (o thwetšwe leboelela).
3.  Mme Tamlyn Bouwer bjalo ka Mohlankedimogolwane wa Ditšhelete (CFO) wa Khansele ya Bosetšhaba ya Baagi ba Mengwako (NHBRC).
4.  Morena Morongwa Calvin Molongoana bjalo ka Motlatša Molaodipharephare (DDG) wa Thekgo ya Dipalopalo le tšaTshedimošetšo kua Stats SA. 
5.  Mme Daphne Yandiswa Morudu bjalo ka DDG: Peakanyo ya Bosetšhaba ya Afrika Borwa ya Dipalopalo kua Stats SA. 
6.  Morena Rory Gallocher bjalo ka Mohlankedimogolwane wa Ditiro Kantorong ya Mopresidente. 

D.  Melaokakanywa

1.  Seakanywa sa 2023 sa Molaokakanywaphetošwa wa Dikhamphani 

1.1.  Kabinete e dumeletše tlhagišo Palamenteng ya Seakanywa sa 2023 sa Molaokakanywaphetošwa wa Dikhamphani gore o lebeledišišwe. 

1.2.  Ditšhišinyo tša ka gare ga Molaokakanywa wo nepokgolo ya tšona ke go fediša ditšhalelomorago tša taolo le tša tsamaišo go bengdikgwebo ebile di tla kaonafatša ponagalo ye e gokagoketšago ya Afrika Borwa go babeeletši bao ba holofetšago. Bontši bja diphetošo e be e le tša sethekniki ka sebopego sa tšona, ebile di be di šetšane le go bea sekeng le go hlatholla merero ya go amana le tša tsamaišo. 

1.3.  Ye nngwe ya ditlapele tše bohlokwahlokwa tša mmušo wo wa temokrasi ke tlholego ya mešomo ebile yona nepo ye e ka se phethagale ge go sa rarollwe mathata a go dira gore merero ya go tsenela tša kgwebo e nolofatšwe ka mo Afrika Borwa. 

1.4.  Diphetošo tše di tlo fana gape ka tlhathollo ye e tseneletšego godimo ga ditemana tše mmalwa tša Molaokakanywa wo, tšeo morerokgolo wa tšona e lego go fokotša ditlamorago tša taolokakaretšo godimo ga dikgwebo; go tiiša letsogo kgahlanong le tshepetšo ya tšhelete ka tsela ye sego molaong; go matlafatša dinyakwa tša go utolla tshedimošo le go kaonafatša khuetšo ya bakgathatema ka gare ga khamphani. 

1.5.  Meputso ya go feta tekano, kudukudu maemong a godimodimo a khamphani, ke tlhobaboroko ka mo Afrika Borwa le maemong a boditšhatšhaba. 

1.6.  Diphetošo tša ka gare ga Molaokakanywa wo di tla hlohleletša gore dilo ka moka di be pepeneneng le go hlatholla maikarabelo magareng ga balaodi le balaodiphethiši bjalo ka kgato ya mathomo, le bakgathatema bjalo ka kgato ya bobedi, le gape go kalokana le maswenyego a setšhaba mabapi le maemo a godimodimo a go se lekalekane setšhabeng.

2.  Molaokakanywa wa 2022 wa Tlhapetšo ya Magareng ga Dikgoro tša Mmušo, Thekgo le Magatotharollo (IMSI) 

2.1.  Kabinete e dumeletše go phatlalatšwa ga seakanywa sa Molaokakanywa wa 2022 wa IMSI gore setšhaba se ntšhe sa mafahleng ka ona. 

2.2.  Molaokakanywa wo o tla dirišwa bjalo ka tharollo ya ditlhotlo tše ntši tše di itemogelwago ge mmušo o diriša karolo 100 le karolo 139 tša Molaotheo wa Rephabliki ya Afrika Borwa ya 1996 ge o gapeletšega go dira bjalo ka baka la ditšhitego le mafokodi go tše dingwe tša dikgoro tša mmušo.

2.3.  Karolo 100 e fa mmušo maatla a go tsena seemo ka bogare ge profense e šitwa ke go fihlelela ditlamego tša yona tša tsamaišo le tša kabo ya ditirelo mola Karolo 139 e fa komitiphethiši ya profense maatla a go tsena seemo ka bogare ge mmasepala o sa kgone go fihlelela ditlamego tša ona goya ka Molaotheo goba molao.

2.4.  Molaokakanywa wa IMSI o tsebagaditšwe bjalo ka sedirišwa sa taolo go kalokana le ditlhotlo tša go phethagatša Karolo 139, tlhapetšo le phetleko, gotee le ditlamorago tša magatotharollo a. 

2.5.  Molaokakanywa wo o tla laola phethagatšo ya Karolo 139 ya Molaotheo, go akaretšwa le ditshepedišo tše maleba. O tla fana ka thekgo ye e nyakegago mebasepaleng ye e nyakago thušo, le gape go hlapetša goba go bea mebasepala leihlo gore e fihlelele ditlamego tša yona tša maemo a godimo goya ka Molaotheo goba molao.

E.  Ditiragalo tšeo di Tlago

1.  Sehla sa Metšhelo

1.1.  Kabinete e gopotša batho ka moka gore sehla sa go faela metšhelo sa 2023 se tla bulwa ka Labohlano, 7 Mosegamanye ebile se tla gagaba go fihlela ka la 23 Diphalane 2023. Balefalekgetho ba hlohleletšwa go faela bohlatse bja bona bja tefo ya metšhelo mo go eFiling (www.sarsefiling.co.za(link is external)) goba mo go MobiApp, e lego sedirišwa sa Ditirelo tša metšhelo tša Afrika Borwa (SARS). 

1.2.  Tshepedišo ya go romela bohlatse bja metšhelo e tloga e nolofetše kudu ebile le wona ngwaga wo, SARS e santše e tla tšwelapele ka go sekaseka balefametšhelo ka o tee ka o tee ka mokgwa wa auto-assessment. Magareng ga la 1 le la 7 Mosegamanye 2023, balefalegetho ba romelwa di-SMS goba diemeile ge eba ba kgethilwe go sekasekwa ka mokgwa wo wa auto-assessment. Ge o rometšwe yona SMS ye, kgato ye o swanetšego go e tšea go tloga fao ke go fetleka tshekatsheko yeo ya auto-assessment mo go SARS MobiApp goba ka eFiling. Ge o kwana le tshekatsheko yeo, ga o dire selo. 

1.3.  Thomelo ya bonako le ye nepagetšego ya bohlatse bja metšhelo e netefatša gore balefalekgetho ba dula ba latela molao, ebile e thuša mmušo go abela MaAfrika Borwa ditirelo le go godiša ikonomi.

2.  Mogopo wa Lefase wa 2023 wa FIFA ya Basadi

2.1.  Banyana Banyana, dinkgwete tša Afrika tše di sa tšogo thopa sefoka, ebile e le boikgantšho bja naga ye, ba tla rwala Tshepho le ditoro tša Afrika Borwa magetleng a bona ge ba kgatha tema Mogopong wa 2023 wa FIFA ya Basadi go la New Zealand le Australia go thoma ka la 20 Mosegamanye go fihla ka la 20 Phato 2023. 

2.2.  Kabinete e ba lakaletša mahlatse le mahlogonolo ge ba le gare ba nkgišetšana mahwafa go thopa sefoka. Afrika Borwa e nale lena kgatong ye nngwe le ye nngwe, ebile re tloga re holofela go dira histori le go hlohleletša merolo ye tlago kamoso. 

3.  Mogopo wa Lefase wa 2023 wa Kgwele ya Diatla

3.1.  Mo matšatšing a mmalwa ao a tlago, mahlo ka moka dipapading a tlo lebišwa Motsekapa, mo Afrika Borwa ge go tlabe go thomišwa Mogopo wa Lefase wa 2023 wa Kgwele ya Diatla go thoma ka la 28 Mosegamanye go fihla ka la 6 Phato. E tlabe e le lekga la mathomothomo gore papadi ye ya mabonwa lefaseng ka bophara e swarelwe ka Kontinenteng ya Afrika. 

3.2.    Kabinete e dira boipiletšo go motho mang le mang ka mo nageng go thekga sehlopha se sa basadi ge ba tlabe ba leka ka mešego feela go dira histori ka go thopela Kontinente ya Afrika sefoka sa gauta. 

F.  Melaetša

1.  Ditebogišo

Kabinete e lebiša ditebogišo le go lakaletša mahlatse le mahlogonolo go: 

- Yunibesithi ya Afrika Borwa ge e fihleletše mengwaga ye mentši ya go lekana ye 150 ya go šoma gabotsebotse thutong ya godingwana, le gape go ba yunibesithi ye kgolokgolo le ya kgalekgale mo dileteng tša Afrika tša ka thoko ya borwa bja Sahara ye e ikgafetšego go fihlelela thuto ye hlwahlwa ya go hwetšagala gohlegohle.

- Morena Edward Kieswetter, Mokomišinara wa SARS, morago ga gore a thwalwe bjalo ka modulasetulo wa Setheo sa Lefase sa Bofetamellwane le go ba moAfrika Borwa wa bobedi wa go tsorama bodulasetulo bja sona setheo se. 

- Moatbokheiti Pansy Tlakula ge a kgethilwe leboelela Komiting ya UN ya Phedišo ya Kgethollo ya Semorafe. Paka ya gagwe e tla thoma ka 2024 go fihla ka 2028.

- Moatbokheiti Thembile Joyini ge a kgethilwe go ba Moahlodi wa Lekgotlatsheko la Boditšhabatšhaba la Molao wa go Reniša Khutšo Mošamawatle go thoma ka 2023 go fihla ka 2032. 

- Lekgotla la Difilimo le Diphatlalatšo (FPB) ge le kgethilwe bjalo ka moleloko yo a ipheditšego ka botlalo wa Global Online Safety Regulators Network. Boleloko bjo bo dumelela FPB magato a lefase ka bophara a go lwantšha botlhokotsebe bjo bo diragalago inthaneteng le gape go hlohleletša polokego ka go šomišana le makgotlataolo a kua Australia, United Kingdom, Fiji, Ireland le dinaga tše dingwe. 

2.  Mahloko 

Kabinete e lebiša mahloko a yona go malapa le bagwera ba: 

- Mama Sally Motlana (96), Molwelatokologo wa Mahlwaadibona le moleloko wa go hlomphega kudu wa Sefoka sa Bosetšhaba sa Baobab ka mmala wa Silibere.

- Mme Maggie Mathabatha (61), mohumagadi wa Tonakgolo ya Limpopo, Morena Stanley Mathabatha.

Dinyakišišo: Mme Nomonde Mnukwa – Seboleledi sa Mmušo sa Motšwaoswere
Mogala: 083 653 7485