Kabinete e kopane ka Laboraro, 25 Moranang 2018, ka Tuynhuys, Motsekapa

A. Merero seemong sa bjale

1. Dipoloko tša babotegi le bomahlwaadibona

1.1. Kabinete e leboga batho ka moka lefaseng ka bophara, kudukudu maAfrika Borwa, ka magato a bona a borutho le a lerato morago ga go kwa lehu la mogalegadi Mama Winnie Madikizela-Mandela, lehu la mmotegi wa Tokologo Ngaka Zola Skweyiya le lehu la mosepediši wa yunione ya bašomi Archie Sibeko.

1.2. Babotegi ba rena ba ikgafile ka maphelo a bona torong ya Afrika Borwa ye kaone ebile banna le basadi ba naga ye ba hwetša tlhohleletšo go tšwa diphenkgišanong tša bona tša tokologo.

1.3. Kabinete le yona e tla ba le Mopresidente Cyril Ramaphosa go laetša tlhompho ya yona go diplomate wa Mahlwaaadibona, Motseta George Nene, yo a hlanketšego Afrika Borwa ka mokgwa wa moswananoši le ka boikgafo ka dinakong tša gagwe ge a be a tšhabišeditšwe dinageng tša ka ntle go lokišetša selete sa rena le kontinente ye go šireletša tokologo ya Afrika Borwa.

2. Megwanto ya Leboa Bodikela

2.1. Kabinete e šogašogile seemo sa go fetogafetoga seo se hlagilego gola Leboa Bodikela, seo se amilego palo ye bonagalago ya ditirelo, kudukudu ditirelo tša maphelo. Bjalo ka mmušo wo o nago le tlhokomelo, Kabinete e dumeletše magatotharolo a mabedi a semeetseng go bušetša taolo sekeng le boitsetsepelo lefelong le.

2.2. Kabinete e dumeletše boipiletšo bja Karolo 100(1)(b) ya Molaotheo wa Rephabliki ya Afrika Borwa wa 1996 go rarolla masetlapelo ao a lego molaleng, kudukudu ka lefapheng la tša maphelo. Morerokgolo wa magatotharollo a ke:

• go bušetša potego le boitshepho sekeng magareng ga bašomi le mmušo;
• go thuša profense go kaonafatša dipeakanyo tša yona le mabokgoni go ya maemong a mafsa a tlwaelo;
• go netefatša kobamelo ya tlhako ya mmušo ya semolao le ya taolo;
• go tiišeletša tikologo ya bašomi, go bušetša sekeng kabo ya ditirelo yeo e swarelelago, go netefatša tšhireletšego ya bašomi le go kaonafatša taolo ya ditšhelete.

2.3. Kabinete le yona e laetše sehlophatšhomo sa Ditona go etela profense ya Leboa Bodikela go hwetša nnete bathong. Ba letetšwe go tliša pego mo dibekeng tše pedi tšeo di tlago. Pego yeo e tla thuša go hwetša magatotharollo a goya pele ao a ka nyakegago.

2.4. Sehlophatšhomo se se arogantšwe ka Ditona tša Kgoro ya Borulaganyi, Tlhokomelo le Tekolo (kgoro ye e biditšego pitšo); Kgoro ya Maphelo; Kgoro ya Ditšhelete; Kgoro ya Tirišano ya Makala a Pušo le Merero ya Setšo, gotee le Sehlopha sa Ditona tša Kgoro ya Toka, Thibelo ya Bosenyi le Tšhireletšo.

2.5. Mola Kabinete e le gare e lemoga dipelaelo tšeo di hlagišitšwego ke setšhaba, Kabinete e kgalema ka bogale ditiragalo tša dikgaruru, go ipha dilo ka kgang le tshenyo ya thoto yeo e bego e tsamaišana le megwanto mo mafelong ao a itšego a profense.

3. Ditherišano tša meputso tša lefapha la bohle

3.1 Kabinete e sedimošitšwe ka ditherišano tša meputso tša Ditirelo tša Setšhaba. Kabinete e dirile boipiletšo go Kgoro ya Tirelo le Taolo ya Setšhaba gotee le komiti yeo e fanago ka ditaelo go šoma go feta tekano go rarolla tlabego ye lego gona ditherišanong tša meputso.

4. Megwanto ya dipese

4.1. Kabinete e dira boipiletšo go bakgathatema ka moka lefapheng la dinamelwa tša bohle go dira gore mogwanto wa dipese wa bosetšhaba o fihle mafelelong ka potlako. Re dira boipiletšo bathong ka moka go boela ditherišanong gore ba kgone go fihlelela kwano yeo e kgotsofatšago bakgathatema ka moka mo nageng.

5. Dikgaruru Lepatlelong la Moses Mabhida

5.1.  Kabinete e kgalema ka bogale dikgaruru tša go se hlamatsege le tshenyo ya ka boomo ya thoto ka balatedi ba kgwele ya maoto morago ga go šwahlela ka lebaleng Lepatlelong la Moses Mabhida nakong ya papadi ya Premier Soccer League mafelelong a beke.

5.2. Dikemedi tša phethagatšo ya molao di hlohleletšwa go netefatša gore batho ka moka bao ba amegago bohodung le ditiragalong tša dikgaruru papading ye ba ikarabele ka tšeo ba di dirilego.

5.3. Kabinete e dira boipiletšo bja dinyakišišo tša ka pejana le phethagatšo ya magato ao a nanogilego a tšhireletšo go netefatša polokego ya babogedi le bahlankedi. Kabinete e dira boipiletšo go bakgathatema ka go šomišana le dinyakišišo go efoga ditiragalo tša mohuta wo kamoso.

6.    Diteišene tša seyalemoya tša setšhaba

6.1. Kabinete e amogela kwano yeo e fihleletšwego ya go hlomesetša diteišene tše 15 tša seyalemoya tša setšhaba tšeo di bego di fegilwe ke Sentech ka baka la go se lefele ditefelo tša phatlalatšo ya maphoto a kgašo, mola ditharollo tšeo di swarelelago di le gare di lebeletšwe.

6.2. Kwano ye e fihleletšwe morago ga gore mmušo o kopane le Sentech, Foramo ya Bosetšhaba ya Diyalemoya tša Setšhaba, Lekala la Phapano le Tlhabollo ya Bogaši (MDDA) le Bolaodi bjo bo Ikemetšego bja Dikgokagano tša Afrika Borwa (Icasa).

6.3. Lefapha la seyalemoya sa setšhaba ke sefala se bohlokwa sa dikgokagano seo se fago batho ba gaborena khumanego ya tshedimošo ebile se šoma bjalo ka mekgwa ya go bopa setšhaba seo se sedimošitšwego. Bakgathatema ka moka ba kwane go bitša kopano go se goye kae go tla ka ditharollo tša go tšea lebaka le letelele tšeo di tla dirago gore diteišene tše di swarelele.

7. Baetapele ba Kopano ya Mmušo ya Kgweranoditšhaba

7.1. Kabinete e thabela kamogelo ya Lenaneo la Magato a Kgweranoditšhaba mo mengwageng ye mebedi yeo e tlago.

7.2. Mopresidente Ramaphosa o eteletše pele Baromiwa ba Afrika Borwa go leba Kopanong ya Baetapele ba Mmušo ya Kgweranoditšhaba (CHOGM 2018) ka fase ga morero wo: “Re lebile Bokamosong bjo bo swanago” go thoma ka la 19 go fihla ka la 20 Moranang 2018.

7.3. Ka gona go hloma Afrika Borwa bjalo ka lefelo le lengwe leo le etilego pele dipeeletšo tša mebaraka tšeo di tšwelelago, Mopresidente Ramaphosa o file polelo go Seboka sa Baetapele ba Afrika ba Foramo ya Kgwebo ya Kgweranoditšhaba, le go boledišana le babeeletšibagolwane ba boditšhabatšhaba le baetapele ba dikgwebo. Mopresidente o fane gape ka memo go babeeletši bao ba etilego pele le baetapele ba dikgwebo go ba gona Samiting ya Dipeeletšo yeo e letetšwego kudu ya Afrika Borwa yeo e beakanyeditšwego mafelelong a ngwaga wo.

7.4. Ka fase ga boetapele bja Mopresidente Ramaphosa, baromiwa ba Afrika Borwa le bona ba šomišitše monyetla wo o hlagišitšwego ke CHOGM go tšwelapele go huetša bonkgetheng bja Afrika Borwa Khanseleng ya Tšhireletšo ya Ditšhabakopano (UN) ya paka ya go thoma ka 2019 go fihla ka 2020. Dikgetho tše di beakantšwe go swarwa ka la 8 Mosegamanye 2018 gola New York, USA.

8. Dipeeletšo

8.1. Kabinete e amogela thwalo ya Mopresidente Ramaphosa ya dikemedi tše nne tša moswananoši mo dipeeletšong go boledišana le babeeletši ba ka mo nageng le ba dinageng tša ka ntle ka bobedi ga bona mabapi le dibaka tša ikonomi mo Afrika Borwa.

8.2. Dikemedi tše di laeditše go tanya šedi ya dipeeletšo ka mokgwa wo o nago le šedi le ka tsheketšo. Lesolo la dipeeletšo le tla ruma ka khonferense ya kgoparara ya dipeeletšo go ela mafelelong a ngwaga go kgoboketša tšhelete ya go feta R1 trilione ya dipeeletšo tše difsa mo mengwageng ye mehlano.

9. Go tsebagatšwa ga lebenkele la Makgonatšohle la InvestSA la Gauteng

9.1.  Kabinete e hlohleletša ka maatla babeeletši ba ka mo nageng le ba boditšhabatšhaba go diriša dinolofatši tša dipeeletšo tša mabenkele a diprofense a Makgonatšohle a tsebagatšwago ka nageng ka bophara – la moragorago e lego Lebenkele la Gauteng la Makgonatšohle.

9.2. Lebenkele la Makgonatšohle la InvestSA ke lenaneo la bopresidente la go hlohleletša le go kgontšha dipeeletšo ka Afrika Borwa. Lebenkele la Makgonatšohle la InvestSA le šetše le phethagaditšwe ka katlego gola KwaZulu-Natala le Kapa Bodikela.

9.3. Disenthara tša dipeeletšo tša Lebenkele la Makgonatšohle di gare di a hlongwa diprofenseng ka moka, ebile di tla šomišwa go rulaganya le go tsenyeletša ditikologo tša moswananoši tša ikonomi, dietšensi tša profense tša dipeeletšo, balaodi ba ka mo nageng le dikgoro tše maleba tša mmušo tšeo di amegago mo mererong ya bolaodi, boingwadišo, diphemiti le ya dilaesense.

10. Dikarata tše difsa tša Panka ya Poso tša Poskantoro le tša SASSA

10.1. Kabinete e amogela phethagatšo ya makgoraditsela ya dikarata tše difsa tša Etšensi ya Afrika Borwa ya Tšhireletšo ya Leago (SASSA) kua dikantorong tšeo di kgethilwego tša poso gola Kapa Bodikela go dumelela baholegi ba dithušo tša tšhelete ya leago go tliša dikarata tša bona tša bjale gore ba hwetše tše difsa tša panka ya poso tša Poskantoro ya Afrika Borwa (SAPO) le SASSA.

10.2. Baamogedi ba mphiwafela wa leago le bengdikarata ba santše ba ka kgona go diriša dikarata tšeo ba nago le tšona go fihla ka Manthole 2018, eupša Kabinete e hlohleletša baamogedi ba go iša dikarata tša bona tša kgale gore ba hwetše tše difsa ka go etela lekala la bona la kgauswi la SASSA goba la SAPO go thoma ka la 2 Mopitlo go fihla mafelelong a Lewedi 2018.

11. Thuto ya Godimo

11.1.  Kabinete e amogela kgatelopele yeo e dirilwego phethagatšong ya thuto ya mahala bjalo ka ge e hlatholotšwe ke Tona ya thuto ya Godimo le Tlhahlo. Kwalakwatšo ya tlhatlošo yeo e bonagalago mo kabaganyong ya mathomomayo go NSFAS go thoma ka R9,849 bilione ka 2017/18 go fihla go R35,321 bilione ka 2020/21 e laetša boikgafo bja mmušo go thuša baithuti go tšwa malapeng a bahloki le malapeng a bao ba šomago.

12. Lenaneo la Thekgo la SMME

12.1. Kabinete e amogela go tsebagatšwa ga Tlhohleletšo ya Thwalo Mešomong ka Lenaneo la Thekgo la dikgwebopotlana, tša magareng le tše kgolo (di-SMME) leo e lego kgwebišano magareng ga Kgoro ya Tlhabollo ya Dikgwebopotlana (DSBD) le Yunione ya Yuropa.

12.2.  Lona le tla thekga di-SMME ka ditirelo tša tlhabollo ya kgwebo, la ba thuša go fihlelela mebaraka, go kaonafatša khumanego ya bona ya ditšhelete, le go thuša go nolofatša tšhalelomorago ya tša tsamaišo le tša taolo mo dikgwebopotlaneng.

13. Saense le Theknolotši

13.1. Kabinete e reta batho ka moka bao ba amegago temogong ya ZACUBE-2, e lego sathalaete ye kgolokgolo mo Afrika ya go gatela pele kudu ya mohuta wa cube. Sathalaete ya boima bja 4kg ya ZACUBE-2 yeo e tšweleditšwego ke ba Yunibesithi ya Mahlale ya Cape Peninsula (CPUT) le Sehlongwa sa Mahlale sa Afrika Borwa le Fora, le go laolwa ke Etšensi ya tša Mafaufau ya Bosetšhaba ya Afrika Borwa e thekgilwe ka ditšhelete ke Kgoro ya Saense le Theknolotši. Yona ke sathalaete ya bobedi ya mohuta wa nano yeo e tšweleditšwego CPUT.

13.2. Sathalaete ye ya cube e rometšwe India gore ba e romele lefaufaung. E tla thuša go kgoboketša tshedimošo go kgontšha kgolo ya ikonomi mo ikonoming ya mabopong. Mohuta wo wa nanosatellite o tla thuša go rarolla dinyakwa tša lenaneo la Lesolo la Mabopong la Operation Phakisa le go thuša gape go lota ditiragalo tša mabopong go bapa le mabopo a Afrika Borwa le go nkgelela mello ya hlaga ka mafolofolo.

14. Indaba ya Meepo ya KwaZulu-Natala

14.1. Kabinete e amogela dipoelo tša Indaba ya Meepo ya KwaZulu-Natala ya matšatši a mabedi, fao baromiwa ba šogašogilego ditaba tšeo di tla thušago go fetoša lefapha le go kgontšha dibaka tša go amana le ditshepedišo tša kgwebo ya meepo mo profenseng.

14.2. Meepo ke le lengwe la mafapha ao a ka re thušago go fetoša ikonomi ya rena le gona Kabinete e ipileditše dikhamphaning tša meepo, bašoming le setšhabeng go maatlafatša dikamano tše ka nepo ya gore meepo e swarelele.

A. Diphetho tša Kabinete

1. Kabinete e dumeletše Tlhako ya Tlhokomelo le ya Tekolo bakeng sa Pholisi ya Bosetšhaba ya Bafsa (NYP) 2015-2020. Tlhako ye e fana ka boikarabelo le botswerere mo phihlelelong ya dinepo tša NYP tša 2020. Pholisi ye e nepile go kaonafatša phethotiro le go hlatloša kabo ya ditirelo, kudukudu mananeong a bafsa.

2. Kabinete e dumeletše Lenaneo la go swarwa ga Kgwedi ya Afrika ya Ngwaga ka Ngwaga la Mopitlo 2018 ka fase ga morero wo: ‘‘Ngwaga wa Nelson Mandela – go Agwa Afrika ye Kaone le Lefase le Kaone’’. Mo kgweding ya Mopitlo go ketekwa diphihlelelo tšeo di dirilwego tlhabollong ya Afrika. Ditiragalo tša gona di gagaba go fihla ka Letšatši la Afrika ka la 25 Mopitlo, ebago letšatši leo le tsebagaditšwego ke Yunione ya Afrika ebile le ketekwa Afrika.

3. Kabinete e sedimošitšwe ka pego le magatotharollo ao a dirilwego ka seemo sa tshwarompe ya thobalano, tlaišo le melato ye megolo ya maitshwaro a mabe kgahlanong le maloko ao a thwetšwego a Sešole sa Bosetšhaba sa Afrika Borwa (SANDF) ao a thekgago Morero wa Ditšhabakopano wa Boitsetsepelo gola Democratic Republic of Congo.

3.1.  Le ge Kabinete e kgotsofaditšwe ke magatotharollo ao a dirilwego go rarolla ditlaišo tše, e santše e kgalema ka bogale ka mo go kgonagalago mohuta ofe goba ofe wa tlaišo ya thobalano le ditiragalo tša maitshwaro a mabe ka maloko a SANDF mo mafelong ao ba ilego ka morero.

3.2. Go thwetšwe sehlopha sa go nyakišiša ditatofatšo tšeo di beilwego. Le ge e le gore melato ye mengwe e rumilwe, ye mengwe e šetše e le mo seemong sa ditsheko tša sešole. Dinyakišišo tše ka moka di dirilwe ka go latela ditshepedišo tša semolao tša sešole ka mokgwa wa go se fihle selo le ka boikarabelo.

3.3. Bjalo ka setlwaedi Afrika Borwa e santše e tla tšwelapele go tšea magato a ka pejana ge e rarolla ditiragalo tša mohuta wo. Go hloka maitshwaro le maitshwaro a bosenyi mo maemong a SANDF ke bohlola ebile go ka se kgotlelelwe le gatee. Bao ba humanwego gore ba tšwile tseleng ba tla kgalengwa go ya ka Molao wa Maitshwaro le Molao wa Kgalemo wa Sešole.

3.4. Kabinete e thekgile gape le go rungwa ga Molaokakanywa wa Kgalemo wa Sešole, wo o lebeletšego go swaragana le dikgalemo tša kakaretšo ka gare ga SANDF, go akaretšwa le go tiišeletša tlhalošo ya tshwarompe ya thobalano le gore kotlo ya fasefase ya melato ye e hlatlošetšwe go fihla mengwageng ye lesome.

B. Melaokakanywa

1. Kabinete e dumeletše phatlalatšo ya Molaokakanywa wa 2017 wa Taolo ya Ditšweletšwa tša Motšoko le Dipeakanyo tša Thomelo ya Elektroniki ka Kuranteng ya Mmušo gore setšhaba se fe ditshwayotshwayo tša sona.

Molaokakanywa wo o phumola Molao wa Taolo ya Ditšweletšwa tša Motšoko, 1993 (Molao 83 wa 1993) e le gona go hlohleletša maphelo a bohle le go tsepanya molao wa Afrika Borwa wa taolo ya motšoko gotee le Kopano ya Tlhako ya Mokgatlo wa Bolefase wa tša Maphelo mo Taolong ya Motšoko. Wona o šetšana le dintlhakgolo tša go amana le mafelo a ka gare a bohle, go laetšwa ga ditšweletšwa tša motšoko mafelong a bobapatši, tšhomišo ya didirišwa tša elektroniki le go tsebagatšwa ga diphuthelwana tša go hloka mebala tša ditšweletšwa tša motšoko.

2. Kabinete e dumeletše phatlalatšo ya Molaokakanywa wa Tlhako ya Mohlakanelwa wa 2018 ka Kuranteng ya Mmušo gore setšhaba se fe ditshwayotshwayo tša sona. Molaokakanywa wo o lebeletše go fihlelela thulaganyo yeo e rulagantšwego ya mohlakanelwa go ralala didiko tša mmušo ka moka, tšeo di gatago ka mošito o tee le go šomišana go hlohleletša phethagatšo ye nago le mohola ya Leanotlhabollo la Bosetšhaba (NDP).  

Go hloma setlwaedi sa thulaganyo ya mohlakanelwa go tsamaišana le NDP ebile go šeditše go tliša dipoelo tša boikgafo bja Tlhako ya Leanopeakanyo la Paka ya Magareng la 2014-2019 go hloma magato le mabokgoni mo Mmušong a go kalokana le thulaganyo ya tlhabollo ya lebaka le letelele. Go hloma setlwaedi se go tla hlohleletša gape le Mmušo wo o rulagantšwego wa go arabela batho wo o tla bago le mohola kudu go hlohleletša diphetogo tša dikgoro tšeo di nyakegago bakeng sa kgolo yeo e akaretšago batho ka moka, le gape go hlabolla motheo wa methopo ya batho ba naga ye le temokrasi yeo e tieletšego.

C. Ditiragalo tšeo di tlago

1. Letšatši la Tokologo

Kabinete e reta maAfrika Borwa ka moka le mafapha ka moka bao ka ditsela tša go fapafapana ba kgathago tema meketekong ya bjale ya Kgwedi ya Tokologo. Mopresidente Ramaphosa o tla fa polelokgolo meketekong ya Letšatši la Bosetšhaba la Tokologo ka la 27 Moranang 2018 kua Lepatlelong la Ngaka Petrus Molemela gola Bloemfontein, Freistata ka fase ga morero wo: “Ngwaga wa Nelson Rolihlahla Mandela: re lebile temogong ye tletšego ka botlalo ya tokologo ya rena ka diphetogomoka tša ikonomi maphelong a rena”.

Tiragalo ye e tla latelwa ke Difoka tša Tlhompho tša Bosetšhaba tša 2018 ka Mokibelo, 28 Moranang 2018 gola Pretoria fao Mopresidente Ramaphosa a tla fago baamogedi bao ba nago le maswanedi Sefoka sa Baobab, Sefoka sa Ikhamanga, Sefoka sa Luthuli le Sefoka sa Bafelegetši ba OR Tambo. Difoka tša Bosetšhaba ke difoka tša maemo a godimodimo tšeo Afrika Borwa e fanago ka tšona, ka Mopresidente, go badudi le maloko a setšhaba sa boditšhabatšhaba bao ba kgathilego tema ye kgolo go dira gore naga ye e be setšhaba sa tokologo, setšhaba sa temokrasi le setšhaba seo se atlegilego; seo se kopanego ka go fapafapana ga sona.

2. Meketeko ya Letšatši la Bašomi

Kabinete e dira boipiletšo bašoming ka moka go ralala naga ka bophara go tsenela meketeko ya Letšatši la Bašomi ka Labobedi, 1 Mopitlo 2018 le go lebelela diphenyo tša ditokelo tša bašomi go tloga mola temokrasi e thomago. Letšatši le ke segopotšo sa gore mafelo a mošomo a swanetše gore a bolokege le gore bengmešomo ba swanetše go dira tše ntši go netefatša polokego ya bašomi ba bona, kudukudu ka lefapheng la meepo. Kabinete e lebišitše gape mantšu a yona a kgothatšo go malapa, bagwera le bašomimmogo ba borameepo ba tshela bao ba swelego go fihlela ba neela moya ge pese ya go ba iša mošomong e be e fišwa ka pomo ya petrole yeo e fošitšwego ke bahlasedi bao ba sa tsebjwego. Kabinete e ipileditše go maloko a setšhaba go thuša maphodisa mo maitekelong a bona a go ruma molato wo ka pejana.

D. Melaetša

Kabinete e lebogiša:

1. Modiragatši wa MoNdebele Esther Mahlangu, yo a amogetšego lengwalo la honorary doctorate go tšwa Yunibesithing ya Johannesburg ka temogo ya tema ya gagwe ye tšwago pele go setšo le bokgabo bja tlhago bja Afrika Borwa.

2. Sehlopha sa Afrika Borwa seo se phaphamišitšego folaga ya rena Dipapading tša Kgweranoditšhaba gola Australia Gold Coast, ge se be se fetša ka maemo a botshelela ka palomoka ya dimetale tše 37 (digauta tše 13, disilibere tše 11 le dipronse tše 13). Go atlega ga bona ke dipoelo tša go šoma ga boima, go ba le maikemišetšo le go ba le kgotlelelo. Ye ke tšhušumetšo go boramabelo ba bafsa ebile ke tiišeletšo ya gore dipapadi ke karolo ye nngwe ya setšhaba yeo e re kgokaganyago felo gotee bjalo ka maAfrika Borwa.

2.1. Bafenyi ba maemo a godimo bao ba thopilego dimetale tša gauta ba akaretša ba:

• Caster Semenya – lebelo la basadi la 800m le la 1500m;
• Luvo Manyonga – papadi ya banna ya go fofa ka botelele;
• Ndodomzi Ntutu – papadi ya banna ya T12 100m;
• Henri Schoeman – papadi ya banna ya go rutha, go reila paesekele le go kitima;
• Tatjana Schoenmaker – papadi ya basadi ya go rutha ya botelele bja 100m le 200m;
• Chad le Clos – papadi ya banna ya go rutha ya botelele bja 50m, 100m le 200m;
• Cameron van der Burgh – papadi ya banna ya go rutha ya botelele bja 50m;
• Akani Simbine – papadi ya banna ya botelele bja 100m; le
• Martin Erasmus – papadi ya dikgoka ya banna ya boima bja 97kg.
• Profesara Sibongile Muthwa le Ngaka Geraldine Fraser-Moleketi ka go bewa ditulong malobanyana mo bjalo ka motlatšamokhanselara le mokhanselara go ya ka go latelana ga bona kua Yunibesithing ya Nelson Mandela.

4. Sehlopha sa Afrika Borwa ka go thopa difoka tša bolesome tša Kgothakgothe ya Bolefase ya tša Kgwebo gola Istanbul, Turkey ka Moranang 2018, ka temogo ya boikgafo le boitlamo bja naga ye bja go tšwetšapele di-SMME. Kgoro ya Tlhabollo ya Dikgwebopotlana gotee le mogwebišani wa yona, 22 on Sloane, elego khamphase ya kgoparara ya mo Afrika, e thopile Sefoka sa Ngwaga sa Naga ya Kgwebo ya Bolefase. Sehlopha sa Afrika Borwa se thopile gape le Sefoka sa Dikonokono tša Leswaokgwebo le Dikonokono tša Diphatišišo, elego sefoka seo se lemogago dinaga tša Netweke ya Bolefase ya tša Kgwebo go tšwa lefaseng ka bophara.

E. Bao ba thwetšwego mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

1.  Motlatšatona Mondli Gungubele bjalo ka Modulasetulo wa Lekgotla la Public Investment Corporation SOC Limited.

2.  Mohumagadi Thandaza Zenobia Lungile Shandu bjalo ka Motlatšamolaodipharephare: Thekgo ya Kgoro le Tsamaišo Kgorong ya Tirišano ya Makala a Pušo le Merero ya Setšo.

Dinyakišišo: Mohumagadi Phumla Williams – Seboleledi sa Kabinete sa Motšwaoswere
Mogala: 083 501 0139