A. Merero e Bohlokwa Seemong sa Bjale 

1. Ntwa ya Magareng ga Russia le Ukraine 

1.1. Kabinete e tšwela pele go belaela kudu ka baka la ntwa yeo e tšwelago pele ya magareng ga Russia le Ukraine. Ditlamorago tša ntwa ye, tšeo di amago leago le ikonomi, di setla pelo gomme seabe sa yona se tlo ama lefase ka bophara.  

1.2. Kabinete e ipiletša gore go be le tharollo ka dipoledišano gomme ya hlohleletša dinaga tše gore di hlmphe le go šireletša ditokelo tša botho, di be di latele maikano a tšona go ya le ka molao wa boditšhabatšhaba le molao wa botho wa boditšhabatšhaba. 

1.3. Mmušo o tšwela pele go thuša MaAfrika Borwa gore a tšwe ka nageng ya Ukraine, gomme palo ya go bonala ya bona e šetše e boile gae. Re ile ra laetša gape le pelaelo ya rena tabeng ya tshwarompe ya MaAfrika ao a lekago go tshela mellwane ya boditšhabatšhaba mo nakong ye. 

1.4. Re dumela gore dinaga tšeo di hlabologago di swanetše le tšona di ipshine ka go tšea karolo le go ba le lentšu ka ditheong tša pušo tša boditšhabatšhaba. Ka go realo, Afrika Borwa e ipiletša gore go be le mokgwa wa tekatekano wa boditšhabatšhaba gape le mpshafatšo ya ditheo tša boditšhabatšhaba gore go be le tšweletšopele ya tekatekano. 

2. Kopano ya tša Dipeeletšo ya Afrika Borwa (SAIC)

2.1  Afrika Borwa e tla swara kopano ya bone ya SAIC ka Labone la 24 Hlakola 2022 go la Sandton Convention Centre ka Johannesburg. kopano ye ke karolo ya lesolo la mmušo la dipeeletšo leo le nepilego go goketša peeletšo ya tšhelete ya go lekana ditrilione tše 1.2 tša diranta mo mengwageng e mehlano yeo e tlago, gomme kopano ye e goketša dikemedi go tšwa ka Afrika Borwa le lefaseng ka bophara go tlo boledišana ka menyetla ya go beeletša. 

2.2. Esale go tloga kopanong ya mathomo ya dipeeletšo ka 2018, Afrika Borwa e gokeditše dibilione tše 774 tša diranta tša dineelo ka Makaleng a go fapafapana a ikonomi. Peeletšo ye ye mpsha e tla re thuša gore re godiše ikonomi, re hlole mešomo yeo elego e hlokwa kudu re be re hlabolle maphelo a batho. 

3. Ditaba tša Gabjale Mabapi le Bolwetši bja Kokwanahloko ya Khorona (COVID-19)

3.1. Kabinete e lemogile mautekelo a nag age go etla ntweng kgahlanong le COVID-19 efela ya lemoša gore ntwa ye ga sešo e fela, gomme ya hlohleletša batho ka moka ka Afrika Borwa go tšwela pele go ntšha mahlo dinameng le go tšwela pele go itšhireletša gore ba emiše go phatlalala ga kokwanahloko ye ya go bolaya. 

3.2. Kabinete e thabišitšwe ke gore ditšhwaana tša meento ya COVID-19 tšeo di batamelago dimilione tše 32 di šetše di hlabetšwe batho, le gore dipersente tše 42 tša batho ba bagolo di šetše di entetšwe ka botlalo. 

3.3. Le ge go le bjalo, batho bao ba sego ba entelwa ba sa tšwela pele go se šireletšege kgahlanong le COVID-19 gomme ba ipea kotsing le go bea bao ba lego kgauswi le bona kotsing. Go entelwa e sa dutše e le yona tsela e kaonekaone ya go lwa le COVID-19, gomme Kabinete e ipiletša go batho ka moka bao nago le mengwaga e 12 le go feta gore ba se sa senya nako, ba entelwe.

3.4. Meento ya go matlafatša bjale e gona bakeng sa batho ka bontšhi gomme Kabinete e ipiletša go bao ba nago le maswanedi gore ba e hlabelwe ka pela ka moo go kgonegago. Re swanetše gape re tšwele pele go apare dimaske tšeo di thibelago molomo le nko, re hlape diatla goba re tlole sanithaesa ka mehla, re bule sekgoba le go netefatša gore re bula matsikangope gore moya o tsene. 

4. Indaba ya tša Enetši ya Afrika 

4.1. Kabinete e amogetše go phethwa ka Katlego ga Indaba ya tša Enetši ya Afrika yeo e bego e swaretšwe go la Cape Town go tloga ka la 1 go fihla ka la 3 Hlakola 2022 ka tlase ga moeno woo o rego “Kopano ya tša Kgwebo yeo e Kgethilwego ya Lekala la Enetši ka Afrika”. Kopano e kopantšhitše batšeakarolo bao ba nago le khuetšo e kgolo go tšwa ka mo nageng le lefaseng ka bophara ba ka lekaleng la enetši go tlo boledišana ka fao kontinenete ya Afrika e ka šomišago enetši bjalo ka sedirišwa sa go godiša ikonomi le go hlabolla maphelo a batho. 

4.2. Afrika Borwa e tšwela pele go itlama go fihleleleng motswako wa enetši woo o sepedišanago le dinepo tša yona tša tlhabollo mola ebile e netefatša gore kabo ya enetši e šireletšegile. 

5. Go Thwalwa ka Lekaleng la Tšhireletšo 

5.1. Kabinete e amogetše go thwalwa ga mešomo ya maemo a godimo ka Botšhotšhising bja Bosetšhaba (NPA) le ka Etšensing ya Tšhireletšo ya Mmušo (SSA). Mopresidente Ramaphosa o thwetše Moadfokeiti Andrea Johnson go ba Hlogo ya Bolaodi bja Dinyakišišo, gape le Moambasadara Thembisile Majola bjalo ka Molaodipharephare (DG) wa SSA. 

5.2. Mopresidente o thwetše gape le Moadfokeiti Navilla Somaru bjalo ka Molaodi wa Botšhotšhisi bja Setšhaba (DPP) ka Profenseng ya Foreistata; Moadfokeiti Matodzi Rachel Makhari-Sekhaolelo bjalo ka DPP ka Profenseng ya Leboa Bodikela, gape le Moadfokeiti Nicolette Bell bjalo ka DPP wa ka Kapa Bodikela. 

5.3. Go thwalwa mo go tla matlafatša bokgoni bja rena bja go nyakišiša le go tšhotšhisa mehuta ka moka ya bosenyi le bomenetša. 

6. Ketelo ya Peoleihlo ya Kabo ya Ditirelo 

6.1. Kabinete e amogetše ketelo yeo e atlegilego ya peoleihlo ka Tona ya Mešomo ya Setšhaba le Mananeokgoparara, Mme Patricia de Lille le Tona ka Kantorong ya Mopresidente, Morena Mondli Gungubele protšekeng ya mararankodi a tsela ya N2 ka Mmasepalengmogolo wa Nelson Mandela Bay ka Kapa Bohlabela ka Labobedi la 8 Hlakola 2022. 

6.2. Ketelo ye ke karolo ya lesolo la mmušo la tekolo ya ka mehla ya tšwelopele yeo e dirilwego ge go etla phethagatšong ya Leano la Peeletšo ka Mananeokgoparara la go tsošološa ikonomi le go hlola mešomo. 

6.3. Yona protšeke ye e na le menyetla ya dintlo tše 12 100 tšeo di nago le skwere-mithara tše 500 000 tša sekgoba sa mabenkele, dikantoro le mafelo a difeme, gape le mafelo a go fapafapana a setšhaba le leago. 

7. Letšatši la Basadi la Boditšhabatšhaba 

7.1. Afrika Borwa e bile karolo ya lefase ya go keteka Letšatši la Basadi la Boditšhabatšhaba ka Labobedi la 8 Hlakola 2022. Letšatši le ke monyetla wa go lebelela morago go bona leeto leo re le sepetšego ge go etla tšweletšongpele ya tekatekano ya bong le seo se hlokago go dirwa gore re be setšhaba seo se nago le tekatekano ya bong. 

7.2. Kabinete e kgahlilwe ke dikatlego tše dintšhi tšeo di swanelwago ke go ketekwa esale mola demokrasi e thomago. Afrika Borwa e tloga e bile le tšwelopele ge go etla tšweletšongpele ya tekatekano go basadi ka Makaleng a bjalo ka mmušo, ka setšhabeng, ka tshepedišong ya toka, dipapadi le tša setšo. Le ge go le bjalo, Kabinete e sa bušeletša gore go sa na le mošomo o montšhi woo o swanetšego o dirwe go netefatša gore basadi ba tšea karolo ka botlalo ka ikonoming ya Afrika Borwa. 

7.3. Kabinete e amogetše gape go kgethwa ga Afrika Borwa go ba Modulasetulo kopanong ya Komišene ya tša Maemo a Basadi ya Ditšhabakopano yeo e tlo swarwago go tloga ka Mošupologo wa la 14 Hlakola 2022 go fihla ka la 25 Hlakola 2022. 

8. Tšhireletšo ya Mmušo 

8.1. Kabinete e lemogile Kgoro ya Matlotlo ya Amerika ge e golegile batho bao ba belaelwago go ba ba sepetša tšhelete ka bomenemene. Re tšwela pele go šoma le bangwekarena ba boditšhabatšhaba go thibela go sepetšwa ga tšhelete ka bomenemene. 

8.2. Makala a rena a tša tšhireletšo a tšwela pele go ntšha mahlo dinameng gomme a ikgokaganya ka mehla le ba ditirelo tša bohlodi tša boditšhabatšhaba ka mo Afrika Borwa le moš’amawatle. Mošomo wa bona o akaretša go abelana ka tshedimošo mabapi le matšhošetši ao a tlago ka batšhošetši le ba ka letsogong la nngele ba kotsi. 

9. Dikgaruru Setšhabeng 

9.1. Kabinete e kgadile ditiragalo tša bjale tša dikgaruru le dithulano tša setšhaba ka Alexandra kgauswi le Sandton. Ga go na mabaka a go se kgotsofale afe goba afe ao a ka dirago gore go be le kgatako ya ditokelo tša batho ka mo nageng. 

9.2. Kabinete e amogetše go tsena ka bogare ka pela ga makala phethagatšo ya molao, elego seo se bušitšego khutšo ka lefelong leo, mmogo le go golegwa ga batho bao ba belaelwago go ba bona bahlodi ba dikgaruru sethabeng. 

9.3. Ditšhaba di hloleletšwa go šomiša mekgwa wa khutšo go rarolla dithulano gape le go bega ditiragalo ka moka tšeo di sego molaong go makala a phethagatšo ya molao. 

10. Ikonomi

10.1 Kabinete e lemogile dipalopalo tša letseno la naga (GDP) tšeo di sa tšwago go lokollwa ke ba Statistics South Africa tšeo di bontšhago gore GDP ya Afrika Borwa e gotše ka dipersente tše 1.2 ka kotareng ya bone ya 2021 morago ga go theoga ka dipersente tše 1.7 ka kotareng ya boraro ya 2021. Se se bontšha gore go bile le kgolo ya dipersente tše 4.9 ka Afrika Borwa. Magoro ao a dirilego gore go be le kgolo ke a tša temo, tšweletšo-ka-bontšhi, ditirelo le dinamelwa.

10.3 Kabinete e sa tšwela pele go tielela le go tšwela pele go šoma le bašomišanimmogo le yon aba leago gore go be le kgolo ya ikonomi yeo e akaretšago le go hlola tikologo yeo go yona re tla kgonago go šomana le dihlotlo tša tlhokego ya mešomo, bohloki le go se lekalekane. 

11. Go Rekišwa Okšeneng ga Maphoto a Seyalemoya ao a Nyakwago Kudu 

11.1. Kabinete e lebogišitše ba Taolo ya Dikgokagano ya Afrika Borwa (ICASA) ge ba thomile go rekiša maphoto a seyalemoya ao a nyakwago kudu okšeneng le ge go na le melato yeo e tšwelago pele. 

11.2. Kabinete e lebogišitše gape batho bao ba nyakago go reka maphoto bao ba tšeerego karolo ka okšeneng ka Labobedi la 8 le Labone la 10 Hlakola 2022, elego seo se bontšhago maikemišetšo a intaseteri ya tša kgokagano go tšwela pele go beeletša ka mananeongkgoparara a ditšithale ka Afrika Borwa. 

11.3. Mmušo o tšwela pele o ikgafile go hlola sebaka seo se kgontšhago maphoto a seyalemoya gore a šomišwe ka botlalo, gomme a sa šomišwe feela ke didintaseteri tša kgokagano eupša le go hola ikonomi le setšhaba. 

11.4. Go fana ka dilaesense tša maphoto a seyalemoya ao a nyakwago kudu go tla hlabolla bokgoni bja dikhamphani tša dinetweke tša dillathekeng go aga kgokagano ka dillathekeng yeo e tiilego yeo e tla dirago gore e fihlelele le mafelo a kgole. Dikholego tše kgolo tša tshepedišo ye, yeo e emetšwego ka tetelo e kgolo, di akaretša go fokotšwa ga ditheko tša datha le go founa. 

11.5. Maphoto a a letetšwe gape gore a be le seabe mpshafatšong ya ikonomi ka Makaleng a go fapafapana gomme tšhelete yeo e tlo humanwago go tšwa okšeneng e tla oketša mokotla wa bosetšhaba ka dibilione tše 8 tša diranta. 

12.  Komišene ya Bosetšhaba ya Dilothari (NLC)

12.1. Kabinete e lemogile tšwelopele yeo e tšwelego ka magetla yeo e fihleletšwego ke ba Yuniti ya Dinyakišišo tše Ikgethilego dinyakišišong tša bona tšeo di tseneletšego tša tshepedišompe le bomenetša ka gare ga NLC, gomme ya hlohleletša makala a mangwe a phethagatšo ya molao ao a šomanago le taba ye go phetha mošomo wa ona ka pela ka moo go kgonegago. Se se tla netefatša gore magato a maleba a ka tšewa go phara ka molato batho bao ba šupilwego ge go etla taolongmpe ya mašeleng ao a bego a beetšwe go thuša bahloki. 

B. Diphetho tša Kabinete

1. Leano la Bosetšhaba la Mananeokgoparara (NIP) la 2050

1.1. Kabinete e fetišitše NIP 2050 gore e phethagatšwe. NIP e tla ka diprotšeke tšeo di swanetšego di be le seabe dinepong tša tlhabollo tša naga tša nako e telele tša ikonomi le leago. 

1.2.  Leano le le humane palo ya go bonala ya ditshwayatshwayo morago ga gore le phatlalatšwe gore setšhaba se fane ka ditshwayatshwayo ka Phato 2021. Dikakanyo di amogetšwe le go tšwadipoledišanong le batšeakarolo bao ba fapafapanego ka lekaleng la mananeokgoparara. Dipoledišano di akareditše le ditheo tša selete le kontinenete bjalo ka Southern African Development Community le Komišene ya Mananeokgoparara ya Yunione ya Afrika. 

1.3.  NIP e kgontšha tlhabollo ya mararankodi a mananeokgoparara a naga ao a sepelelanago le Foreimweke ya Bosetšhaba ya Tlhabollo ya Mafelo gape le Sekao sa Tlhabollo ya Selete (DDM). E lebelela gape le go agwa ga mananeokgoparara ao a lego bohlokwa tlhabollong ya ikonomi le leago, mmogo le go hlola mešomo le menyetla ya matlafatšo yeo e nabilego ya ikonomi ya Bathobaso. 

2.  Leano la Kabo ya Kgase ya Petroliamo yeo e Fetošitšwego Seela (LPG) 

2.1.  Kabinete e fetišitše go phatlalatšwa ga Leano la Kabo ya LPG la 2022 ka Kuranteng ya Mmušo gore setšhaba se fane ka ditshwayatshwayo mabapi le lona. Leano le le lebeletše go ba le mohola tabeng ya go šomana le dihlotlo tša enetši ka mo nageng. 

2.2.  Leano le šomana le, gareng ga tše dingwe, sebopego sa mmakete wa gabjale wa LPG, mananeokgoparara ao a šetšego a le gona, mokgwa wa go bea diporeisi gape le bokgoni bja tšweletšo ka bontšhi bjoo naga e nago le bjona bja go dira mabotlelo a dikgase tša LPG. Leano le šomana gape le lesolo la polokego le temogo ya gore kgase e bonwe bjalo ka sedirišwa seo se loketšego tikologo. 

3. Leanotekolo la Intaseteri ya Mebaene ya Afrika Borwa 

3.1. Kabinete e fetišitše Leanotekolo la Intaseteri ya Mebaene ya Afrika Borwa. Leano le tla, gareng ga tše dingwe, tla ka dikimollo ka leaning la yona la phethagatšo gore go be le sethalwa seo se nago le dintlha ka moka sa thutalefase go hlabolla datha ya thutalefase ya naga. 

3.2.  Leano le šišinya gape tšhomišanommogo gareng ga Kgoro ya Diminerale le Enetši le Koporase ya Tlhabollo ya Intaseteri go netefatša gore tekolo e kgontšha go akaretšwa ga dikhamphani tšeo di golago tša go šoma ka tekolo. Le matlafatša gape karolo ya diphatišišo yeo e tlo tšewago ke ditheo tša diphatišišo tše bjalo ka MINTEK le Lekgotla la Diphatišišo tša Saense le Intaseteri, mmogo le lenaneo la tlhabollo ya mabokgoni. 

3.3. Leano le ke dipoelo tša dipoledišano tšeo di nabilego magareng ga mmušo, intaseteri le bašomimmogo ba tša leago. Intaseteri ya mebaene e tšwela pele go ba kokwanekgolo ya ikonomi ya naga. 

4.  Phethagatšo ya Leanompshafatšo la Batho Pele la 2021

4.1.  Kabinete e fetišitše Phethagatšo ya Leanompshafatšo la Batho Pele la 2021. Leano le ke dipoelo tša palo ya go bonala ya diphatišišo tšeo di dirilwego ke bobedi mmušo le ditheo tšeo esego tša mmušo mabapi le go šoma ka phethagalo ga Pholisi ya Batho Pele ya 1997. 

4.2.  Leano le tla ka dikokwane tše hlano tšeo di tlo hlahlago melawana ya motheo yeo e swanetšego go latelwa ke dikgoro ka moka. Dikimollo tšeo di šišintwego di tla kgonagatša lenaneo la tirelo ya setšhaba leo le lebantšhitšego baduding. 

4.3. Leano le le tla re gape la kgonagatša matlafatšo ya pušo yeo e kgonago, e latelago melao ya boitshwaro e mebotse ebile e hlabollago, elego yona kimollo e bohlokwahlokwa ge go etla tabeng ya go hlankela badudi ba Afrika Borwa. Le tla re gape la matlafatša phethagatšo ya mehola e seswai ya Batho Pele. Sa mafelelo, leano le le lebeletše go fetola maitshwaro ka gare ga Tirelo ya Setšhaba. 

5. Go fetošwa ga pholisi go maphoto ao a nyakwago kudu, le tsela yeo pholisi e e tšeago ge go etla kabong ya dilaesense tša mararankodi ao a buletšwego bohle a maphoto a seyalemoya (WOAN)

5.1. Kabinete e fetišitše go fetošwa ga pholisi go maphoto ao a nyakwago kudu, le tsela yeo pholisi e e tšeago ge go etla kabong ya dilaesense tša WOAN, gore e phatlalatšwe gore setšhaba se fane ka ditshwayatshwayo mabapi le yona. Ditšhišinyo tšeo di dirilwego tša diphetošo di tloša dinyakwa tša go ba le laesense ya WOAN. 

5.2. Kabinete e rile ka 2019 ya fetiša pholisi ye ya maphoto ao a nyakwago kudu le le tsela yeo pholisi e e tšeago ge go etla kabong ya dilaesense tša WOAN go kgonasgatša Molao wa Dikgokagano tša Elektroniki wa 2005 (Molao wa bo 63 wa 2005). Kabo ya dilaense tša maphoto ao a nyakwago kudu e dutše e sa le bohlokwa lesolong la tsošološo ya ikonomi ya naga. 

6. Sekhwama sa Kimollo ya Dithekisi (TRF) go Imolla Ditlamorago tša COVID-19

6.1. Kabinete e fetišitše go katološwa ga nako ya go dira dikgopelo tša TRF go tloga go la 31 Hlakola 2022 go fihla go la 31 Hlakola 2023. TRF, yeo e nago le tekanyetšo ya dibilione tše 1,135, e abilwe e le tefelo ya go tla gatee feeela go imolla ditlamorago tše mpe tša ditšhelete tšeo di hlotšwego ke COVID-19 intasetering ya dithekisi. 

6.2. Sekhwama sa Matlafatšo sa Bosetšhaba se rwele maikarabelo a lefela mašeleng a go bengdithekisi ka moka bao ba lego molaong ebile ba nago le dilaensense tša go šoma ka dithekisi, gomme go balwa tšona dithekisi, dithekisi tša go ba le dimitara gape le dithekisi tša go bitšwa ka inthanete. 

C. Melaokakanywa

1. Molaokakanywaphetošo wa Poso ya Afrika Borwa (SAPO) wa 2021 

1.1. Kabinete e fetišitše go phatlalatšwa ga Molaokakanywaphetošo wa SAPO gore setšhaba se fane ka ditshwayatshwayo mabapi le wona. Molaokakanywa o lebeletše go fetoša Molao wa SAPO wa 2011 (Molao wa bo 22 wa 2011). 

1.2. Ditokišo tšeo di šišintšwego di lebeletše go kgontšha SAPO go šomiša theknolotši yeo e lego gona ka mafelong a yona. SAPO e tla kgona go mpshafatša mekgwa ya yona ya go šoma gape le go katološa morero wa yona. E tla ba moabaditirelo tša poso le khoria wa maemo a lefase; tirelo ya tshepedišo ya dithoto yeo e logagantšwego; kgwebo ka inthanete, gomme gape e tla ba mothopo wa ditšithale bakeng sa kgwebo le ditšhaba. Diphetošo tšeo di šišintšwego, tšeo di sepelelanago le Pego ya Pholisi ya Bosetšhaba yeo e Logagantšwego ya ICT ya 2016, le tšona di kaonafatša mokgwapušo wa SAPO. 

2.  Molaokakanywaphetošo wa Panka ya Poso ya Afrika Borwa wa 2021 

2.1  Kabinete e fetišitše go išwa ga Molaokakanywaphetošo wa Panka ya Poso ya Afrika Borwa wa 2021 Palamenteng. Molaokakanywa o fetoša Molao wa Panka ya Poso wa 2010 (Molao wa bo 9 wa 2010) gore o sepelelane le Molao wa Dipanka wa 1990 (Molao wa bo 94 wa 1990). Wona o kgontšha go langwa ga Khamphani yeo e Laolago Panka ya Poso ya Afrika Borwa go ya le ka Molao wa Dipanka wa 1990. 

2.2  Molaokakanywa o sekasekilwe le setšhaba gore o matlafale. Ge o se no amogelwa go ba Molao, gona Panka ya Poso e tla kgona go šoma bjalo ka lekala leo le ikemetšego ebile le nago le melao ya lona ya go šoma le se ka tlase ga SAPO. 

3.    Molaokakanywa wa Sekhwama sa Taolo ya Ditšhila tšeo di Lego Kotsi 

3.1  Kabinete e fetišitše go phatlalatšwa ga Molaokakanywa wa Sekhwama sa Taolo ya Ditšhila tšeo di lego Kotsi gore setšhaba se fane ka ditshwayatshwayo mabapi le wona. Molaokakanywa o kgontšha go hlangwa ga sekhwama bjalo ka ge go laetšwe ke Pholisi ya Taolo ya Ditšhila tšeo di lego Kotsi. 

3.2  Mašeleng a tla kgoboketšwa gore a tlo šomišetšwa taolo ya ditšhila tšeo di lego kotsi. Sekhwama se tla kgontšha go hlangwa ga mananeokgoparara ao a tlago kgona go rwala, go bea le go hlokomela go lahlelwa saruri ga ditšhila tšeo di lego kotsi. Sekhwama se tla laolwa ke ba Setheo sa Bosetšhaba sa Go Lahlwa ga Ditšhila tše Kotsi. 

3.3  Afrika Borwa e holega go tšwa enetšing yeo e hlwekilego yeo e hlangwago ke Setiši sa Maatla a Nutllere sa Koeberg. Se sengwe gape ke gore Afrika Borwa e tšwela pele go bay o mongwe wa batšweletši ba bagolo ba ditšweletšwa tša meriana yeo e šomišwago go phekola le go alafa kankere mo lefaseng. 

D. Ditiragalo tšeo di sa Tlago 

1. Ketelo ya Semmušo ya Mopresidente wa Mozambique 

1.1. Mopresidente Cyril Ramaphosa o tla amogela mongkayena wa Mozambique elego Mopresidente Fiipe Nyusi ka Labohlano la 11 Hlakola 2022. 

1.2.  Ketelo ye e tla twela pele ya matlafatša tšhomišanommogo gareng ga dinaga tše tše pedi. E matlafatša gape dikamano le tšhomišanommogo gareng ga Afrika Borwa le Mozambique ka maemong a sepolotiki le ikonomi. 

2.  Imbizo ya Mopresidente ka Profenseng ya Leboa Bodikela

1.1. Ka Mokibelo wa la 12 Hlakola 2022, Mopresidente Ramaphosa o tla eta pele kemedi go ya ka Leboa Bodikela go yo swara Imbizo. Nakong ya tiragalo ye, Mopresidente le baetapele go tšwa makaleng ka moka a mararo a mmušo, ba tla boledišana le ditšhaba ka Leboa Bodikela. 

1.2. Imbizo ye ya Mopresidente, elego ya mathomo ya 2022, e fa Mopresidente sebaka sa go boledišana le ditšhaba mabapi le maitemogelo a tšona go bophelo bja ka tšatši ka tšatši le kabo ya ditirelo ka mmušo. Badudi bat la tla boledišana thwii le yena ka ga ditšhišinyo tšeo ba nago le tšona mabapi le ka fao re ka godišago Afrika Borwa ka gona ntle le go šia mang goba mang morago. 

1.3. Go latela DDM, yeo e ipiletšago gore go be le tšhomišanommogo ya go tšea gabotse gareng ga badudi le baetapele ba setšhaba, Kabinete e hlohleletša ditšhaba tša Leboa Bodikela go šomiša monyetla wo go boledišana thwii le Mopresidente gape le go dira gore dipelaelo goba ditšhišinyo tša tšona di kwewe. 

2.  Letšatši la Ditokelo tša Botho 

2.1. Kabinete e amogela dipoledišano le ditiragalo tšeo di tšwelago pele bjalo ka karolo ya go keteka Letšatši la Ditokelo tša Botho la ngwageng wo ka la 21 Hlakola 2022 ka tlase ga moeno wo: “Ngwaga wa Botee le Mpshafatšo: Go Šireletša le go Lota Diphihlelelo tša rena tša Ditokelo tša Botho”. Se gape se lebeletše le tšwelopele ya protšeke ya molaotheo wa demokrasi wa setšhaba. 

2.2. Kabinete e ipiletša go MaAfrika Borwa ka moka go šomiša Kgwedi ya Ditokelo tša Botho go hlohleletša go ba ngatana e tee, go aga setšhaba le go ba bate. Ke mošomo wa rena bjalo ka setšhaba gore re lwele go fihlelela tlhabollo ya leago le ikonomi mola ebile re netefatša gore re lwa le semorafe le tše dingwe tša go swana naso tša go se nyakege. 

3. Beke ya Meetse ya Bosetšhaba

3.1. Lesolo la Beke ya Meetse ya Bosetšhaba le tla ba ka Lamorena la 20 go fihla ka Mokibelo wa la 26 Hlakola 2022, gomme le tla lebelela tlhokego ya go šireletša le go lota didirišwa tša rena tša go sepetša meetse. 

3.2.  Ntle le dipula tše maatla go fetla ka moo go tlwaelegilego tšeo di nelego ka dikarolong tše ntšhi tša naga mo dikgweding tše mmalwa tšeo di fetilego, Afrika Borwa e tšwela pele go ban aga yeo e hlokago meetse a lekanego. Ke e nngwe ya dinaga tše 30 tšeo di se nago meetse mo lefaseng, gomme bontšhi bja meetse a yona a tšwa puleng. 

3.3. Kabinete e netefaleditše badudi gape gore meetse a rena a pompi a loketšwe go nwewa ke batho, bjalo ka ge se se tiišeleditšwe ke ba Setheo sa Bosetšhaba sa Malwetši a go Fetela, gape le gore dipego tša mabapi le meetse tša gore ga a sa nwega ka baka la kokwanahloko ya typhoid ke maaka. Mmušo o beile pele taba ya go agwa le go tsentšhwa ga didirišwa tša go sepetša meetse. 

E. Melaetša 

1. Ditebogišo 

Kabinete e rometše ditebogišo le go akela mahlatse le mahlogonolo go: 

- Sehlopha sa Afrika Borwa sa Basadi sa Krikhethe, seo se phagamišitšego leina la Afrika Borwa phadišanong ya Sebjana sa Lefase sa ICC sa Basadi go la New Zealand. 

- Ramabelo Stephen Mokoka, yoo a robilego rekoto ya lefase ya lebelo la banna la dikilomitara tše 50 ka nako ya iri tše pedi, metsotso e 40 le metsotswana e 13 lebelong la Nedbank Runified Breaking Barrriers leo le bego le swaretšwe go la Gqeberha ka Kapa Bohlabela ka Lamorena la 6 Hlakola 2022. 
 

2.  Matshidišo 

Kabinete e rometše matshidišo go ba lapa le bagwera ba::

Morena Mandla Ka-Mabuza (47), motaki, moanegi ebile e le Mopresidente wa maloba wa South African Students’ Congress (Sasco). Yena o kile a ba mohlankedi wa setšhaba ka Kgorong ya Mešomo ya Setšhaba le Mananeokgoparara. 

F. Go Thwalwa 

Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.

1.  Morena Zane-Udien Dangor Molaodipharephare ka Kgorong ya Dikamano le Tšhomišano ya Boditšhabatšhaba.

2. Mme Phindile Patronella Mkwanazi bjalo ka Motlatša-Molaodipharephare ka lekaleng la Tlabollo ya Go Ithuta le Boprofešenale ka Sekolongtlhahlo sa Mmušo sa Bosetšhaba. 

3. Morena David Mamphitha bjalo ka Hlogophethiši ya Lekgotla la Polokego ya Maphelo ka Mebaeneng. 

4. Batho bao ba tlo šomelago Lekgotla la Ditirelo tša Difofane tša Boditšhabatšhaba: 
(a) Mme Nomveliso Ntanjana (Modulasetulo);
(b) Morena Nare Thupana (Motlatšamodulasetulo);
(c) Morena Grant Reagon Son;
(d) Morena Tumelo Chipfupa; le
(e) Mme Pfumelani Dorcas Mbulayeni.

5. Batho bao ba tlo šomelago Lekgotla la Kabo ya Dilaesense tša Ditirelo tša Difofane: 
(a) Morena Leroy Musa Nsibande (Modulasetulo);
(b) Mme Raesibe Sharon Kekana (Motlatšamodulasetulo);
(c) Morena Rickie Rodger Rennie; 
(d) Mme Zonica Leanda Mtshali; le 
(e) Morena Ramovha Emmanuel Mbuwe.

Dipotšišo: Mme Phumla Williams – Seboleledi sa Kabinete 
Mogala: 083 501 0139