Back to top

Primary tabs

Xitatimente hi mayelana na Rikhutla na Nhlengeletano ya Khabinete yo Hlawuleka ya le moyeni leyi khomiweke hi Ravumune, 27 na Ravuntlhanu, 28 Sunguti 2022

A. RIKHUTLA RA KHABINETE

1.1. Phuresidente Cyril Ramaphosa u rhambe Rikhutla ra Khabinete hi Ravumune, 27 Sunguti 2022. A ri ngheneriwile hi swivumbeko swa vurhangeri leswi yimelaka swiyenge hinkwaswo swa mfumo. Swona swi katse Vaholobye, Swandla swa Vaholobye, Tiphurimiya, Valawuri-Jenerali na vurhangeri bya Nhlangano wa Mfumo wa Miganga wa Afrika-Dzonga.  

1.2. Phuresidente u rhambe varhangeri va mfumo tanihi xiphemu xa ku pfanganisa na ku fambelanisa miangulo ya mfumo eka mitlhontlho leyi nga langutana na tiko, ngopfungopfu ku kongomisa hi xihatla eka ku tirhana na mitlhontlho yinharhu ya vusweti, mpfumaleko wa mitirho na nkandzingano. U kombele varhangeri ku humelerisa miantswiso eka ku pfuxa ku kula ka ikhonomi na ku tumbuluxa mitirho leyi dingiwaka swonghasi hi mpimo wa le henhla swinene.

1.3. Phuresidente u seketele nkoka wa Xivono xa 2030 xa Kungu ra Nhluvukiso wa Rixaka na Kungu ra ku Akiwa hi Vuntshwa na Nhlakarhelo wa Ikhonomi ku hatlisisa matshalatshala ya ku antswisa swiyimo swa vanhu va Afrika-Dzonga.

1.4. Hi ku engetela eka xiyimo xa ikhonomi na miantswiso leyi nga na xivumbeko, Rikhutla ra Khabinete ri tlhele ri kanela nhluvukiso wa swimakiwakulu, nsirhelelo wa eneji, ku tirhisiwa ka swa laha tikweni na ku endliwa ka tiindasitiri, miantswiso ya misava na vurimi, na antswiso wa mabindzu lama nga ehansi ka vun'wini bya mfumo.

1.5. Matshalatshala ya ku hunguta mpfumaleko wa mitirho na vusweti ya ta katsa mpfangano wa mitirho ya sekitara leyi nga riki ya mfumo leyi engeteleke, mitirho leyi hakeleriwaka hi mfumo na nsirhelelo wa vanhu lowu ndlandlamukisiweke eka vanhu lava nga tirhiki.

1.6. Nhlengeletano leyi yi tlhele yi kanela mitlhontlho na ku ya emahlweni eka ku lwisana na vugevenga na vukungundzwana, na matshalatshala ku tiyisa vuhlayiseki na nsirhelelo wa vaaki. Yi tlhele yi kanela mphakelo wa vukorhokeri bya mfumo wa miganga – ku katsa na mphakelo wa gezi, mati na nkululo – tanihi xiphemu xa ku aka vuswikoti bya Mfumo.

1.7. Mikanelo ya Rikhutla ra Khabinete yi endleriwa ku letela swirhangana swa mfumo swa lembe leri yaka emahlweni leswi Phuresidente Ramaphosa a nga ta swi andlala hi nkarhi wa Mbulavulo wa Phuresidente wa Xiyimo xa Rixaka hi Ravumune, 10 Nyenyanyana 2022.

B. SWIBOHO SWA KHABINETE

1. SA Connect – Kungu ra Xiyimo xa 2

1.1. Khabinete yi pasise ku hangalsiwa ka xiyimo xa vumbirhi xa phurojeke ya SA Connect. Kungu leri ri humelerisa Pholisi ya Swihondzokulu leyi amukeriweke hi Khabinete hi 2013.  Xiyimo xa 1 xi tirhe tanihi xiyimo xa ndzingeto ku nyika vukorhokeri bya swihondzokulu bya 10 ra Timegbiti (Mbps) eka kwalomu ka 970 miako ya mfumo ya nkoka swonghasi.

1.2. Xiyimo xa vumbirhi lexi pasisiweke xi ta hangalasiwa hi ku tirhisa mavandla lama nga ehansi ka vun'wini bya mfumo (Ejensi ya Thekinoloji ya Vuxokoxoko bya Mfumo [SITA]); Broadband Infraco na Sentech) na indasitiri leyi. Eka 36 wa tin'hweti, phurojeke leyi yi ta khomanisa miako ya mfumo leyi nga sala, miganga na miti.

1.3. Phurojeke leyi yi vumba xiphemu xa vutiboheleri bya mfumo ku pfala vangwa ra xidijitali, ngopfungopfu emigangeni ya le matikoxikaya, na ku antswisa ikhonomi ya xidijitali. Vutekaxiave bya sekitara leyi nga riki ya mfumo byi ta tlhela byi tirhana na ncinco wa sekitara leyi hi ku katsa vatlangaxiave lava faneleke hinkwavo eka sekitara ya netiweke ya xielekitironiki.

1.4. Phurojeke ya SA Connect yi pakanisa ku fikelela 80% ta mfikelelo wa swihondzokulu emigangeni na miako ya mfumo eka malembe manharhu ya ntalo wa rivilo ra mpimohansi wa 10Mbps hi sekondi na 100 Mbps eka miako ya nkoxo wa le henhla.

C. KU THORIWA

Ku thoriwa hinkwako ku fanele ku landzelela vutiyisisi bya mithwaso na mbhasiso lowu faneleke.

1. Mnn Nomthandazo Lichie Moyo tanihi Xandla xa Mulawuri-Jenerali (DDG): Nhluvukiso wa Matikoxikaya eka Ndzawulo ya Vurimi, Antswiso wa Misava na Nhluvukiso wa Matikoxiakaya (DALRRD).
2. Ttn Clinton Rossouw Heimann tanihi DDG: Nkunguhato wa Tindhawu na Malawulelo ya Ntirhiso wa Misava eka DALRRD.
3. Ttn Michael Currin tanihi DDG: Ntirhisano wa le Xikarhi ka Mifumo na Malawulelo ya Vakhomaxiave eka Vufambisi bya Mfumo bya Vuhlanganisi na Mahungu (GCIS).
4. Mnn Regomoditswe Dorcas Mavimbela tanihi DDG: Ku Phurosesiwa ka Mahungu na Vuhangalasi eka GCIS.
5. Mnn Nomonde Mnukwa tanihi DDG: Vukorhokeri bya Xibindzu eka GCIS.
6. Ttn Nhlanhla Edgar Sishi tanihi DDG: Hofisi ya Mpimanyeto eka Vutamelankwama bya Rixaka.
7. Dkd Litha Magingxa tanihi Muofisirinkulu wa Vurhangerinkulu (CEO) tlhelo Phuresidente wa Khansele ya Ndzavisiso wa Vurimi.  Khabinete yi pfumelelane na ku thoriwa ka Khansele
8. Mnn Rofhiwa Irene Singo tanihi Muofisirinkulu wa Timali eka Ndzawulo ya Vululami na Nhluvukiso wa Vumbiwa.
9. Ttn Luvuyo Keyise tanihi CEO wa nkarhinyana wa SITA (U thoriwe hi vuntshwa).

Swirho swa Huvo swa SITA SOC:

1. Mnn Makano Mosidi (Mutshamaxitulu);
2. Dkd Stella Bvuma (Xandla xa Mutshamaxitulu);
3. Mnn Shery-Lee Moonsamy;
4. Mnn Nolitha Pieterson;
5. Mnn Zimbini Hill;
6. Mnn Olwethu Ketsekile;
7. Dkd Tshilidzi Ratshitanga;
8. Dkd Rendani Ramabulana;
9. Mnn Jeanette Morwane (muyimeri wa Ndzawulo ya Vuhlanganisi na Tithekinoloji ta Xidijitali);
10. Mnn Laura Mseme (muyimeri wa Vutamelankwama bya Rixaka); na
11. Ttn William Vukela (muyimeri wa Vukorhokeri bya Mfumo na Mafambiselo).

Swivutiso: Phumla Williams – Muvulavuleri wa Khabinete
Selifoni: 083 501 0139