Back to top

Primary tabs

Tshitatamennde tsha Lekgotla ḽa Khabinethe ḽe ḽa farwa nga vidio nga Ḽavhuṋa, ḽa 27 Phando 2022 khathihi na Muṱangano wa Khabinethe wo Khetheaho we wa farwa na Ḽavhuṱanu, ḽa 28 Phando 2022

A.  LEKGOTLA ḼA KHABINETHE 

1.1.  Phresidennde Vho Cyril Ramaphosa vho vhidza Lekgotla ḽa Khabinethe nga Ḽavhuṋa, ḽa 27 Phando 2022. Lekgotla iḽi ḽo dzhenelwa nga vhurangaphanḓa ho fhambanaho vhune ha imela masia oṱhe a muvhuso. Hezwi zwi katela Dziminisṱa, Vhafarisaminisṱa, Vhalangamavunḓu, Vhalangi Vhahulu khathihi na vhurangaphanḓa ha Dzangano ḽa Mivhuso Yapo ḽa Afrika Tshipembe.  

1.2.  Phresidennde vho ramba vharangaphanḓa vha muvhuso sa tshipiḓa tsha u ṱoḓa u ṱanganya khathihi na u dzudzanya zwavhuḓi zwine muvhuso wa tea u ita nga ha khaedu dzine shango ḽa khou ṱangana nadzo, nga maanḓa u lavhelesa nga nḓila ya tshihaḓu kha u tandulula khaedu tharu dzine dza vha vhushai, u shayea ha mishumo khathihi na u sa lingana. Vho ita khuwelelo kha vharangaphanḓa uri vha lingedze uri hu vhe na tshanduko khulwane vhukuma kha u vusulusa nyaluwo ya ikonomi khathihi na u sika mishumo ine ra i ṱoḓa nga vhunzhi.   

1.3.  Phresidennde vho ombedzela ndeme ya Bono ḽa 2030 ḽa Pulane ya Mveledziso ya Lushaka na Pulane ya Mvusuludzo na Mbuedzedzo ya Ikonomi hu tshi itelwa u khwaṱhisa ndingedzo dza u khwinifhadza nyimele dza MaAfrika Tshipembe.  

1.4.  U ḓadzisa kha zwa tshiimo tsha ikonomi khathihi na tshandukiso ya milayo, Lekgotla ḽa Khabinethe ḽo dovha hafhu ḽa davhidzana nga ha mveledziso ya themamveledziso, u ṋetshedzwa ha fulufulu, u dzhielwa nṱha ha zwibveledzwa zwapo khathihi na u bveledziswa ha nḓowetshumo, Mbuedzedzo ya Mavu na vhulimi khathihi na tshandukiso ya mabindu a muvhuso. 

1.5.  Ndingedzo dza u fhungudza u shayea ha mishumo na vhushai dzi ḓo katela u ṱanganyiswa ha mishumo ya kha sekhithara ya phuraivethe yo engedzwaho, mishumo ya muvhuso khathihi na magavhelo a zwa matshilisano o itelwaho u tsireledza vhathu vhane vha sa shume. 

1.6.  Muṱangano wo dovha hafhu wa amba nga ha khaedu khathihi na mvelaphanḓa yo no swikelwaho kha nndwa ya u lwa na vhugevhenga khathihi na zwiito zwa vhuaḓa, hu tshi katelwa na ndingedzo dza u khwaṱhisa tsireledzo na vhutsireledzi ha vhadzulapo. Wo dovha hafhu wa amba nga ha nḓisedzo ya tshumelo dza kha mivhuso yapo, hu tshi katelwa na nḓisedzo ya muḓagasi, maḓi na vhuthathazwitzhili sa tshipiḓa tsha ndeme tsha u engedza vhukoni ha mashumele a Muvhuso.

1.7.  Nyambedzano dza Lekgotla ḽa Khabinethe ndi dzine dzo livhiswa kha u ḓivhadza zwipikwa zwa muvhuso kha ṅwaha u tevhelaho, zwine Phresidennde Vho Ramaphosa vha ḓo zwi bvisela khagala nga tshifhinga tsha musi vha tshi khou ṋetshedza tshipitshi tshavho tsha Nyambo ya nga ha Tshiimo tsha Lushaka nga Ḽavhuṋa, ḽa 10 Luhuhi 2022.  

B.  TSHEO DZA KHABINETHE

1.  SA Connect – Pulane ya Luṱa lwa 2

1.1.  Khabinethe yo ṱanganedza zwa u ṋetshedzwa ha luṱa lwa vhuvhili lwa thandela ya SA Connect. Pulane iyi i mbo ḓi ita uri Mbekanyamaitele ya Broadband ya shango ḽashu ye ya ṱanganedzwa nga Khabinethe nga ṅwaha wa 2013 i thome u shuma. Luṱa lwa 1 lwo vha lwa thandelathangeli ya u ṋetshedza Megabits (Mbps) dza fumi dza tshumelo dza broadband kha zwiimiswa zwa muvhuso zwa ndeme zwi linganaho 970. 

1.2.  Luṱa lwa vhuvhili lwo ṱanganedzwaho lu ḓo ṋetshedzwa hu tshi shumiswa zwiimiswa zwa muvhuso  (Zhendedzi ḽa Thekhinoḽodzhi ya Mafhungo ḽa Muvhuso [SITA]); Broadband Infraco na Sentech) khathihi na nḓowetshumo. Kha miṅwedzi ya 36 i ḓaho, thandela iyi i ḓo ita uri zwiimiswa zwo salaho zwa muvhuso, zwitshavha na miṱa na zwone zwi kone u vha na vhuṱumani.

1.3.  Thandela iyi i vhumba tshipiḓa tsha vhuḓiimiseli ha muvhuso ha u fhungudza khethululo kha tswikelelo ya didzhithaḽa,  nga maanḓa kha zwitshavha zwa vhupo ha mahayani khathihi na u bveledza ikonomi ya didzhithaḽa. Zwa u shela mulenzhe ha sekhithara ya phuraivethe na zwone zwi ḓo thusa kha u tandulula thaidzo ya u shandukiswa ha sekhithara nga u katela vhashelamulenzhe vhoṱhe vho teaho kha sekhithara ya netiweke ya zwa eḽekhiṱhironiki.     

1.4.  Zwipikwa zwa thandela ya SA Connect ndi u swikela 80% ya tswikelo ya  broadband  ine ya vha na luvhilo lwa fhasisa lwa 10Mbps nga sekonde na 100 Mbps kha zwiimiswa zwine zwa vha na ṱhoḓea khulwane zwa zwitshavha na zwa muvhuso vhukati ha tshifhinga tsha miṅwaha miraru i ḓaho.

C.    U THOLIWA 

U tholwa hoṱhe hu ḓo khunyeledzwa nga murahu ha musi ho ranga u vha na u senguluswa ha ndalukano khathihi na u ṱanzwa dzina ho teaho.

1.  Mufumakadzi Vho Nomthandazo Lichie Moyo sa Muthusamulangi Muhulu (DDG): Mveledziso ya Vhupo ha Mahayani kha Muhasho wa zwa Vhulimi, Mbuedzedzo ya Mavu na Mveledziso ya Vhupo ha Mahayani (DALRRD). 
2.   Vho Clinton Rossouw Heimann sa DDG: Vhupulani ha Fhethu na Ndangulo ya Kushumisele kwa Mavu kha DALRRD.
3.   Vho Michael Currin sa DDG: Tshumisano vhukati ha Mihasho na Ndangulo ya Vhashelamulenzhe kha muhasho wa Sisṱeme dza Mafhungo na Vhudavhidzani ha Muvhuso (GCIS). 
4.  Mufumakadzi Vho Regomoditswe Dorcas Mavimbela sa DDG: Nzudzanyo na Phaḓaladzo ya Mafhungo kha GCIS. 
5.  Mufumakadzi Vho Nomonde Mnukwa sa DDG: Tshumelo dza Tshiimiswa tsha GCIS. 
6.  Vho Nhlanhla Edgar Sishi sa DDG: Ofisi ya Mugaganyagwama kha Muhasho wa Vhufaragwama ha Lushaka.
7.  Dokotela Vho Litha Magingxa sa Muofisiri Mutshimbidzi Muhulwane (CEO) na Phresidennde wa Khoro ya Ṱhoḓisiso dza zwa Vhulimi.  Khabinethe yo tendelana na  u tholwa uhu he ha itwa nga Khoro
8.  Mufumakadzi Vho Rofhiwa Irene Singo sa Muofisiri Muhulwane wa zwa Masheleni kha Muhasho wa Vhulamukanyi na Mveledziso ya Ndayotewa. 
9.  Vho Luvuyo Keyise sa CEO ya tshifhinganyana ya SITA (Vho tou dovha vha tholwa hafhu).

Miraḓo ya Bodo ya SITA SOC:

1.  Mufumakadzi Vho Makano Mosidi (Mudzulatshidulo);
2.  Dokotela Vho Stella Bvuma (Muthusamudzulatshidulo);
3.  Mufumakadzi Vho Shery-Lee Moonsamy;
4.  Mufumakadzi Vho Nolitha Pieterson;
5.  Mufumakadzi Vho Zimbini Hill;
6.  Mufumakadzi Vho Olwethu Ketsekile;
7.  Dokotela Vho Tshilidzi Ratshitanga;
8.  Dokotela Vho Rendani Ramabulana;
9.  Mufumakadzi Vho Jeanette Morwane (Muimeli wa Muhasho wa Vhudavhidzani na Thekhinoḽodzhi dza Didzhithaḽa);
10.  Mufumakadzi Vho Laura Mseme (Muimeli wa Muhasho wa Vhufaragwama ha Lushaka); na 
11.  Vho William Vukela (Muimeli wa Muhasho wa Tshumelo dza Muvhuso na Ndangulo).

Mbudziso: Mufumakadzi Vho Phumla Williams – Muambeli wa Khabinethe 
Luṱingothendeleki: 083 501 0139